Nongpoh, Nailur 12
Ki bor pynïaid distrik jong ka Ri Bhoi ha ka Sngi Ba-ar ki la leit ban khang tala noh ïa kawei ka khyrdop lum khajna jong ka Khasi Hills Autonomous District Council (KHADC) na ka surok bah National Highway 6 kaba don ha ka shnong Umdihar kaba la tip kum ka Non-Tribal Commercial Transport Operators (Check Point).
Ka jingleit khang tala ïa kane ka khyrdop lum khajna ha kane ka sngi la lamkhmat da u Executive Magistrate ka Ri Bhoi District ha ryngkat ka jingïadon lang ki pulit na Nongpoh hadien ka jingïoh hukum na u Deputy Commissioner ka Ri Bhoi, u Arpit Upadhyaya.
Kum ban shu pyntip khyndiat, ïa kane ka khyrdop jong ka KHADC kaba khrong khajna na ki kali bar jylla kiba kit ïa ki mar bapher bapher, la pynïeng ha katei ka jaka la kumba katto katne por bad ka la mih ruh ka jingujor na ki nongñiah kali naba la kynnoh ba la shu pynïeng beaiñ ïa kane ka khyrdop khlem ka jingïoh jingbit na ki bor ba dei khmih jong ka National Highway Authority of India (NHAI).
