Shillong, Nailur 12
U President ka Meghalaya Pradesh Congress Committee (MPCC), uba long ruh u MP ka Shillong, Bah Vincent H. Pala ha ka Sngi Ba-ar u la kren shai ba um don jingmut ban leit pynïasoh sha ka National People’s Party (NPP).
“Ngam ju don kata ka jingmut ban leit sha ka NPP, barabor nga la ong naduh mynshuwa. Nga i ba ngi ki rit paid lada ngi don ha ka Congress ne kano-kano ka seng, ka seng ka long da kumwei, hynrei ka jingïajan, ka jingïadei shimet bad ki heh, ngim dei ban don kata ka jingsngew namar ngi don tang katno ngut eh,” la ong u Bah Pala haba kren sha ki lad pathai khubor.
Haba ai nuksa ba ha Bengal, ka liang synshar bad liang pyrshah kim ju da kham ïakren, u la ong ba haba phai sha ka Jylla, lada jop mano-mano, ka shong ha u paidbah bad haba la jop, hap ban ïatreilang na bynta ka bha ka miat u paidbah.
“Nga u liang pyrshah, ngan hap leit sha ka liang synshar ban kyrpad na bynta ka roi ka par. U liang synshar teng-teng u kwah jingkyrshan na ka liang pyrshah na bynta kano-kano, ngin hap ïadei bad ïatreilang,” u la ong.
U Bah Pala u la ong ruh ba ki briew ki sngewthuh bakla ïa ka jingpyrshang jong ki nongïalam ban ïabeit na bynta ka jingbha jong u paidbah, hynrei ym na bynta ka kam shimet hangne-hangtai.
“Ki mut ba nga ïajan bad u Conrad lane ïajan bad u Metbah, te ngan leit, nga ngam dei uta uba lah ban shu pynngeit kulmar. Ka seng la ka jong, ki kam shimet la ka jong, ka jingbha u paidbah, ngin hap ïa pyrkhat,” u la ong.
Halor ka jingpynkhreh ïa ka ilekshon MP, u President u la ong ba man la ka ilekshon ka ju don beit kata ka jingong ban pynrem ne pynjop ïa uta, hynrei kam shong ha ki nongïaleh hynrei ha u paidbah.
“Ngi te ba la ïaleh te ïaleh beit hynrei ka shong ha ka mon u paidbah, kam shong ha ki nongïaleh, ym kum ka eksam, hynrei ka shong ha kti u paidbah. Ngi pyrshang ban trei katba lah hynrei haba kut hi ka shong ha u paidbah,” u la ong.
Ha kajuh ka por, u la ong ba ka seng ka la ïaid shakhmat bad ka jingpynkhreh na bynta ka ilekshon MDC.
“Katkum ka jingsngewthuh jong nga, ka don ka jingwanrah jingkylla kaba 125 ha ka Riti Syshar ka Ri kaba ka BJP ka la wanrah naduh u 2019. Nga tharai lada ki mynjur, kin mynjur ha u Nohprah mynta u snem. Lada kim mynjur, ka ilekshon kan ïaid kumba dei ban ïaid, hynrei lada ki mynjur, ka eh ban ïoh ïa ka ilekshon ha ka por kaba biang namar ka jingpynkylla kaba bun, ngin hap pynkylla ïa ka Riti Synshar ka Ri India,” u la ong.
Haba ïadei bad katei ka bynta, u Bah Pala u la ïathuh ba kan sa don ruh ka jingpynbeit thymmai ïa ki konstitwensi bad kumta lada ka BJP ka mynjur ïa ka ‘Bill’ kaba ka la wanrah, ka ilekshon ka lah ban shah pynkynriah hynrei lada kim mynjur, kan ïaid beit kumba long.
“Na ka liang jong ngi, ngi pynkhreh baroh – la ha ka por ba ka dei ban long ne la ki pynslem ne pynkynriah ïa ka ilekshon,” la bynrap u MP.
