Shillong, Nailur 12
U President ka Meghalaya Pradesh Congress Committee (MPCC), Bah Vincent H. Pala u la ong ba ka jingthmu jong ka Bharatiya Janata Party (BJP) ban wanrah ïa ka mat halor ‘Kawei ka Ri, Kawei ka Ilekshon’ kumjuh ka jingpynkylla kyrteng ïa ka India sha ka ‘Bharat’ ka long ka buit kumno ban pynneh ïa ka ‘vote’ jong ka seng (BJP) ha ka ilekshon ban wan.
“Ki jaka ba kyrshan ïa ka BJP ki kynthup ïa ka UP, Bihar bad kiwei-kiwei kiba khlaiñ ki kren ktien Hindi. Shi bynta ka dei ka buit ilekshon, hynrei haduh katno u paidbah un bieit na bynta ka kyrteng, un bieit na bynta ka buit ilekshon,” la ong u Bah Pala haba kren sha ki lad pathai khubor ha ka Sngi Ba-ar.
U la ong ruh ba hadien ba u la wan na kylleng ki jaka, u la shem ba kam dei shuh kaba suk ïa ka BJP ban pynneh ïa ka ‘vote’ kaba ka la ïoh ha shuwa, bad ka ïakynduh jingeh shi kat dei ha kane ka liang.
“Namarkata kan sa mih shakhmat bad kine kiei-kiei baroh,” u la ong.
Halor ka ‘One Nation, One Election’, u Bah Pala u la ong ba katei kam dei shuh ka mat ka bathymmai, hynrei ka dei kaba la don jingthmu naduh mynshuwa.
“Lada ka Sorkar ka ïaid shakhmat bad kane, ka long kum shi bynta ban ïuh roit ïa ka hok jong kito ki Jylla kiba la dei ban leit sha ka ilekshon ha kano-kano ka por. Ha India hi, ka don ka jingkhuid ha ka rukom pynlong ïa ki ilekshon. Ka jingkwah jong ka BJP ka long ban pynduh noh ïa ki seng barit baria,” la ong u President.
Haba kdew ba ka Congress kam hun satia ïa katei ka jingthmu ka BJP, u Bah Pala u la pynkynmaw ba ha shuwa u la long teng u dkhot ka Public Grievances ha kaba bun ki la pynpaw ba na bynta ban pynduna ïa ka jinglut jingsep, dei ban don da ka ‘One Nation, One Election’.
“Hynrei ngi na ka liang ka seng ngi ong kam long namar ka long kumba ïuh roit ïa ka hok jong ki briew. Ha ka por ba nga dang don ha ka komiti, ym don ba ïahun napoh ka Congress lait noh tang ka BJP,” la ong utei u nongïalam.
Ha kawei ka liang, haba ïadei bad ka jingpynkylla kyrteng ïa ka India sha ka ‘Bharat’, u Bah Pala u la ong, “Nga tharai kane ruh ka dei ka jingkut lad, ngi ïohi ïa u Modi ba hadien ba pynlong ïa ki jingwad bniah, ka ïoh ka kot jong ka India ka la hiar palat.”
“Nga tharai kawei kaba buh jingma ïa ka BJP…kim lah ban ai ka jingsynshar kaba biang, ki pynmih ïa kine kiei-kiei,” u la ong.
U la ong ruh ba ha ki 10 snem jong ka BJP, ka seng ka la synshar beit thik na bynta katto-katne ki jaidbynriew, katto-katne ki nongkhaïi ha ki bynta bapher-bapher.
Haba kylli, u la ong ba ka kyrteng ‘India’ ka dei kaba la don naduh mynshuwa ha ki por phareng bad ym ju pynkylla ïa ka hynrei ki don pat ki briew kiba don ïa ka jingsngew ban pynkylla noh ïa ka kyrteng ka ri.
“Lada pynkylla, kin sa mih bun ki jingkynthoh namar ka kyrteng ka la neh ha ki kot ki sla nadong-shadong, ban pynkylla kam dei kaba suk. Ki ‘Software’ kiba bun, ym dei tang ha India, hynrei ha palat 200 tylli ki ri jong ka pyrthei ki ithuh kum ka India, ki kor ka juk stad teknoliji ki la ïaid beit ha ka kyrteng ka India, nga sngew kam don jingmut,” u la ong.
Shuh shuh utei u khlieh nongïalam ka MPCC haba bynrap ba ka BJP ka thmu ban pyntreikam ïa ka ‘Hindi’ ha kylleng ki jaka, u la ong ba ki jaka kum ka Thaiñ Shatei Lam Mihngi, Tamil Nadu, Kerala bad kiwei-kiwei wat la kim da sngewjuh ïa ka ktien ‘Hindi’ hynrei ka BJP ka kwah pynlong ‘Hindi’ lut, ‘Bharat’ lut bad ‘Hindu’ lut ïa baroh.
“Kane kam long, kane ka long kawei na ki sienjam jong ki ban pynlong kawei ka ri, kawei ka ilekshon, kawei ka niam…ka jingpynkylla kyrteng ruh kajuh – ka lah ban wanrah ïa ka jingïakhih kaba jur kaba ngim poi pyrkhat,” u la ong.
