Shillong, Nailur 12
Ki shipai Suiñ ne Indian Air Force (IAF) ki la sdang ban kyntur pud shabar na u pud u sam jong ka ktem sah lajong, da kaba pynïeng païa shabar na ka khyrdop jong katei ka jaka ban rung sha u Lum Shillong.
Kane ka jingpyrshang kyntur pud jong ki shipai suiñ ka la pynbitar lep ïa ki paidbah nongshong shnong jong ka dong Khliehshnong, Rngi Shyllong, kaba dang hap hapoh ka Nongkrem konstitwensi.
Ha ka Sngi Ba-ar, ki paid nongshong shnong jong ka Rngi Shillong ki la ïa mih paidbah da ka jingïalam u MLA ka Nongkrem Konstitwensi u Bah Ardent Miller Basaïawmoit ban leit pynsangeh ïa ka jingtrei tam pud ki shipai Indian Air Force ha u Lum Shillong kaba dang hap hapoh ka Dorbar Shnong Rngi Shillong.
La ïoh ban sakhi ba ki shipai suiñ ki la kyntur pud sha surok PWD da kaba tih thliew thymmai ban pynïeng païa markhap bad ka khyrdop kaba rim ban rung sha ka jaka jngohkai pyrthei ha Lum Shyllong. Nalor kane, la lap shuh shuh ba ki shipai suiñ ki la dep pynïeng ruh ar tylli ki païa bad tih ruh ïa ka thliew muri kaba heh da ka puh shilum.
Ha kane ka sngi, na ka liang u Bah Ardent kum u MLA ryngkat bad u paidbah ki la leit sha kane ka jaka. Une u MLA u la kyntu ïa ki shipai suiñ ban mih shabar ka khyrdop ban ïakren halor kane bad ba ki dei ban pynsangeh noh mardor ïa kane ka kam, hynrei la ong ba kine ki shipai ki la khot shapoh ïa u Bah Ardent ban ïakren hynrei um shym la treh satia.
Tang hadien khyndiat por, la wan poi u Wing Commander jong ka Indian Air Force (IAF) ka Eastern Air Command (EAC) ha kane ka jaka bad hadien ka jingïakren bad ka jingdawa ba la buh da u MLA ka thaiñ, u la kular ban pynsangeh noh mardor ïa kane ka jingtrei. Nangta haba ïadei bad kane, ka Deputy Commissioner jong ka East Khasi Hills District ka Kong Rosetta Mary Kurbah ka la rai ban sa khot ïakren halor kane hapdeng ka tnat PWD, ka tnat shipai Suiñ bad ka Dorbar Shnong Rngi Shyllong.
Nalor nangta, u Bah Ardent u la ong sha ki nongshong shnong ba lada kin sdang ban trei biang ban pynïeng ïa kitei ki païa hadien ba la pynsangeh baroh ki nongshong shnong kin ïamih paidbah ban pynsangeh biang.
