Shillong, Nailur 12
Ka Meghalaya Co-operative Apex Bank Ltd. ka la shah jied ha ka National Federation of State Cooperative Banks (NAFSCOB) ban ïoh ïa ki khusnam na ka bynta u snem 2020-21 bad 2021-22 ha kaba ïadei bad ka jinglah ban treikam bha napdeng ki ‘Two Tier Structure’. Ïa kine ki khusnam yn sa ai ha ka jingïalang ka ban long ha Jaipur mynta u bnai.
Katkum u kyrwoh khubor na katei ka Bank, la ong ba ka Bank ka la buh ïa ki tnat treikam jong ka ha kylleng ka jylla bad ka pynbiang ruh ïa ki jingdonkam ban siew bad shim pisa lyngba ki kor ki bor kum ki ATM, Mobile Banking bad Unified Payments Interface (UPI).
La ong ruh ba ka Bank ka dei kaba ïohnong bad ka long ka dkhot jong ka Centralised Payment System, bad namarkata ka don la u jong u IFSC. Ha u snem 2019, ka Bank la shah kynthup ha ka ‘Second Schedule’ ka Reserve Bank of India Act, 1934.
