Shillong, Nailur:
U MLA ka Mawkynrew konstitwensi, Bah Banteidor Lyngdoh u la ong ba wat hapdeng ki jingsniew kiba har rukom kiba nang ktah ïa ka imlang sahlang khamtam u drok uba la suhthied ha kylleng ki jaka ka Jylla Meghalaya bad ktah ïa ki samla, hynrei ym don jingeh ban ïakhun pyrshah ïa ki kam sniew lada ki samla ki ïatreilang.
Une u MLA u la pynpaw ïa kane haba ai jingkren kum u kongsan ha ka jingïalang pynhap pyrda jong ka Shillong Archdiocese Catholic Youth Movement (SACYM) Zone -V ïa ka lympung ïalehkai kaba shisien shisnem ha ka 9 tarik Nailur, 2023 ha Jongksha.
Da kaba ai jingïaroh ïa ki khun samla ka Balang kiba pynlong ïa kum kine ki lympung ïalehkai, u la ong, “Kane ka pyni ïa ka jingïatreilang hapdeng ki samla ban kyntiew ïa ki kam ïalehkai bad phah pat ka khubor ban kiar na ki kam kiba lah ban ktah ïa ka met ka phad bad kiba long pat ka jingtroiñ ïa ka imlang sahlang”.
Shuh shuh, une u nongmihkhmat u la ong ba ka long kaba sngewkhia ban ïohi ba u drok u la teh mraw ïa ki hajar ngut ki samla bad kumta ka jingïatreilang ki samla lyngba ki kynhun balang, ki seng samla shnong, ki sports club kin dei ki atiar bad ki stieh ïada ïa une u jait jingdih.
“Kawei kaba kongsan eh ka dei ka jingskhem jingmut ban ong em ïa u drok bad ki samla kiba la kham sha khmat ki dei ban ïa phylliew jingmut bad ai jingpynshai sha kiwei halor ki jingktah une u jingdih pynbuaid “, la kyntu u Bah Banteidor bad pynpaw pat ka jingsngew kmen ba ki samla lyngba kine lympung pat ki ailad ïa ki samla ban sei ïa ki sap ki phong ïalehkai.
Ha kane ka lympung, ki saw tylli ki Parish ki la ïashim bynta ha ki jingïakob ïalehkai bapher bapher kiba kynthup ïa ka Laitkor, Mawkynrew, Jongksha bad Mawryngkneng bad ka Parish kaba la ïoh rah ïa ka nam lahduh ka dei ka Laitkor Parish.
Ha ka sngi pynhap pyrda ïa kane ka lympung la sakhi lang da u Fr. Sylvester Synrem, uba peit ïa ki samla ka Zone V, u Fr. Suresh, Parish Priest, u Fr. Anthony M Joseph, Assistant Parish Priest, u Bah Olet Kharsahnoh, Sordar Jongksha bad kiwei pat.
