Nongstoiñ, Nailur:
Ka jingsynjor bad ka jingpeit thliew jong ki katto katne tylli ki dieng ilektrik kiba la pynïeng ha ka shnong Mawthir ha West Khasi Hills ki la buh jingma ïa ka ïaid ka ïeng jong ki paidbah.
Halor kane ka bynta, ha ka Sngi Ba-ar, ka Federation of Khasi Jaiñtia & Garo People (FKJGP) Mawthir unit ha ryngkat ka Rambrai Circle hadien ka jingujor jong ki paidbah nongshong shnong, ka la leit ban buh da ka jingthoh sha u Assistant Executive Engineer ka MePDCL Nongstoiñ Division, West Khasi Hills ba un shim khia ban bujli thymmai ïa lai tylli ki dieng ilektrik kiba la jot bad ap jingma.
U Bah Skalanboksis Paliar, President FKJGP Mawthir u la ong ba ha katei ka jingleit buh jingthoh, la kular ba shen tang shu ailad ka suiñ bneng lada ka rang un sa phah ban kit noh ïa kitei ki dieng ilektrik ban leit thung thymmai sha katei ka shnong Mawthir.
Ha kawei pat ka khubor, ka FKJGP Mawshynrut Circle ka la leit ban ïakynduh ïa u EE (PWD Road) halor ka jingjot rathai jong ka surok na ïew Riangdo – Thaiem, wat la katei ka surok ka dei kaba dang shu dep shna dang tang shi snem mynta lyngba ka skhim PMGSY.
U President ka FKJGP Mawshynrut, Bah Teilang Nongkseh u la ong ba ha ka jingïakren bad u EE, u la kular ban leh ïa kaba donkam, kata ba un sa bthah ïa u kontraktor ba u dei ban maramot bad ban pynkhuid ïa ki ñiut kiba don ha shilynter ka surok namar ba katei ka surok ka dang dei ban sumar ne pynbiang da u kontraktor hapoh san snem.
U la ïathuh ruh ba katei ka surok ka dei ka surok kaba pynïasoh ïa ka ïew Riangdo bad ki shnong kiba bun sha ka thaiñ Mawthengkut haduh Thaiem kaba don kumba 7 km eiei.
