Shillong, Nailur 13
U Myntri Rangbah ka Jylla, u Conrad K. Sangma, ha ka Sngi Balang u la ïashim bynta ha ka jingïalang pynhap pyrda jong ka jingrakhe dap 100 snem kaba la neh shi snem kynthih jong ka Laban Bengali Higher Secondary School (LBHSS) ha ryngkat ka jingdonlang u Myntri ka tnad pule-puthi, u Rakkam A. Sangma.
Haba ai jingkren ha ka jingïalang, u Sangma u la ai khublei ïa ka skul kaba la kynjoh ïa utei u mawmer bad ong ba ka dei ka jingïohi jngai jong ki dkhot nongseng, ka jingminot bad jingtrei shitom jong ki nonghikai barim bad ba mynta lem bad ki dkhot ka Managing Committee kaba la pynlong ïa ka skul kumba ka long mynta.
“Nga nud ban ong ba ka pule-puthi ka long kawei na ki mat ba hakhmat eh jong ka Sorkar bad ka Sorkar ka la ting ïa ki mat treikam kiba tawiar ïa ki khynnah pule na bynta ka bha ka miat jong ka pule-puthi hapoh ka Jylla,” u la ong.
Haba kren halor ki jyrwit-jyrwat jong ka jinglong-jingman ka tnad pule-puthi hapoh ka Jylla, u la ong ba ka Jylla ka don kumba 55,000 ngut ki nonghikai bad kumba 15,000 tylli ki skul bad ki shlem pule.
“Ka jingeh ban pynïaid ïa ki skul kiba ïapher ha ka jingdon ki nonghikai bad khynnah – katto katne kiba don tang khyndiat ngut ki khynnah bad katto-katne ki nonghikai katba ki don kiba da ki spah ngut ki khynnah hynrei tang khyndiat ngut ki nonghikai. Kine ki long katto-katne na kiba bun ki jingeh ha ka tnad pule-puthi”, u la ong.
“Ka la don ka jingkylla ha ka tnad pule-puthi ha kine ki 5-6 snem da kaba pynleit jingmut halor ka rai ba la shim kaba long na bynta ki khynnah,” la ong u Myntri Rangbah da kaba bynrap, “Ka jingïarap pisa na ka liang ka Sorkar kaba dei na bynta ka pule-puthi, la ju pyndonkam bakla ha shuwa, hynrei mynta ngi la pynïaid ïa ki ha ka ban pynbha ïa ki jingdon-jingem ha ki skul Sorkar.”
U la ong ruh ba ka jingïarap pisa kaba la lum na bynta ka pule-puthi ha shuwa ym ju pyndonkam ïa ka tat haduh u snem 2019 bad bynrap ba ka Sorkar ba mynta ka la pynïaid ïa ki jingdon-jingem ba la lum ha ka dur jong ka khajna na bynta ban maramot bad tei ïa ki shlem ai jinghikai kiba ai jingmyntoi ïa ki skul Sorkar ha kylleng ka Jylla.
Haba kren halor ka NEP-2020, u la ban jur halor ka jingdonkam jong ki kolej ban tyrwa shuh ïa ki sobjek pule bapher-bapher ha ryngkat ka jingdonkam shuh ïa ki jingdon-jingem bad ki jingtei lem bad ka jinglut ka ban kot kumba T.400-500 klur.
Na ka liang u Myntri Rangbah u la shim ruh ïa ka lad ban pynbna ïa katto-katne ki projek ka roi ka par ba kynthup ïa ka Secretariat bathymmai, jaka pynïeng kali, Community Park, bad ka ‘Ropeway’ da kaba ban biang ba ka Sorkar ka minot ha ka ban wanrah ka roi ka par, ha kajuh ka por ban pyntikna ïa ka jingkyrshan haba ïadei bad ki bynta bapher-bapher jong ka imlang-sahlang ba kynthup ïa ki nongrep, seng kynthei bad ki nongseng kam lajong.
Ha kane ka sngi la ïoh ruh ïa ka jingkren na u Myntri ka tnad pule-puthi ka Jylla, u Rakkam A. Sangma, bad ka jingpynkup burom da u Myntri Rangbah ïa kito kiba wan shakhmat ha ki eksamin bapher-bapher ka MBOSE, nalor ka jingpyllait ïa ka ‘Jubilee Souvenir’ bad ka kot ba la pynbeit da President ka Managing Committee jong ka skul.
