Srinagar, Nailur 13 (UNI)
Uwei u shipai uba bat ïa ka kyrdan Colonel, uwei u Major bad uwei u Deputy Superintendent of Police (DySP) ki la kyllon ïap ha ki kuli jong ki lehnoh ha ka Sngi Balang ha Anantnag distrik jong ka Jammu and Kashmir.
Kane ka dei ka sien banyngkong mynta u snem ba ki bor pahara ha Jammu & Kashmir ki la duh noh ïa ki heh jong ki.
Ki khubor ki ïathuh ba kitei lai ngut, ba kynthup ïa u Colonel uba dei u Commanding Officer ka 19 Rashtriya Rifles, ki la mynsaw ha ka jingïasiat bad ki lehnoh ha ka thaiñ Gadole jong ka Kokernag. Kane ka la jia katba ki bor pahara ki dang pynlong ïa ka jingkerkut ïa ki lehnoh.
“Katba ka jingkerkut ka dang ïaid, ki lehnoh ki la siat na ki ktang suloi jong ki, bad kitei ki lai ngut ki heh ophisar ki la mynsaw, bad kham hadien ki la khlad noh,” la ong ki khubor na ki bor pahara.
Kitei kiba la khlad ki kynthup ïa u Colonel Manpreet Singh, Major Aashish Dhonchak bad u Deputy Superintendent of Police ki pulit Jammu & Kashmir, u Himanyun Bhat.
Ki heh pulit bad shipai kynthup ïa u Director General of Police (DGP) ka Jammu & Kashmir, u Dilbag Singh, u Commander ka 15 Corps, u Lt Gen Rajiv Ghai, uba dei u shipai ba heh duh ha Kashmir, ki la leit sha ka thaiñ Kokernag ban ai jingmut ïa ki bor pahara kiba ïakhun pyrshah ïa ki lehnoh.
Ki bor sorkar ki la phah shuh ïa ki shipai bad ki pulit sha katei ka jaka ban ïakhun ïa ki lehnoh, la ong ki khubor.
Ka Resistance Front, kaba dei ka kynhun ba la shah ñiew be-aiñ bad ïa kaba la ngeit ba ka dei ka shnat jong ka Lashkar-e-Taiba, ka la shim jingkitkhlieh halor katei ka jingsiat ïap ïa ki arngut ki heh shipai bad uwei u heh pulit.
Ka jingïasiat hapdeng ki bor pahara bad ki lehnoh ha ka thaiñ Kokernag ka dei kaba ar ha ki 24 kynta ba la leit noh. Kham ha shwa, uwei u shipai u la khlad bad lai ngut ki bor pahara ki la mynsaw ha ka jingïakhun bad ki lehnoh ha Rajouri distrik ha Jammu. Ki pulit ki la ong ba arngut ki lehnoh ki la shah siat ïap ha kane ka jingïakhun ha Rajouri.
