Shillong, Nailur:
Ka Kynhun Myntri ka Sorkar Jylla ka la ai jingmynjur ban don noh ka tnat pulit la kajong ka ‘engineering wing’ ban peit ïa ki jingtei jingshna kynthup ki kam kiba donkam ban maramot hapoh kane ka tnat.
Haba pynbna ïa kane sha ki lad pathai khubor hadien ka jingïalang ka Kynhun Myntri, u Myntri Rangbah, Conrad K Sangma u la ong ba ka tnat pulit ka don ki kam barit baria kum ki kam ban maramot ïa ki jingtei jingshna, hynrei haba ym don la ki jong ki karikor wat lada donkam ban maramot malu-mala ruh hap ïaid lyngba kiwei pat ki tnat.
Kumta la donkam ban ai jingmynjur ban don noh ka engineering wing la kajong.
Ka Kynhun Myntri ka la ai jingmynjur ruh ban thaw ïa ka State Water Informatics Centre hapoh ka jingpeit jingkhmih ka tnat Water Resources. Ki kam jong kane ka centre ki long ban lum jingtip kham bniah haba ïadei bad ki um ki wah, ka jinglang jong ka um bad ki lad ban tyngkai ïa ka um bad ban ai jingmut na ka bynta ban shim ki rai kiba ïahap.
U la ong ba kane ka jinglum jingtip kan ïarap namar yn tip kham bniah shaphang ka jingdon um ha ki wah da kaba pyndonkam ïa ki kor ki bor kum satellite, drone bad kiwei kiwei.
