Shillong, Nailur 13
Ka dheng kali ha nongbah Shillong kaba la jur lypa na kawei ka sngi sha kawei pat, ka la nang jur shuh shuh khamtam ha ka por ba wan ki heh ki haiñ sha kane ka nongbah.
Ha ka Sngi Balang, ka thaiñ IGP kaba jur bha ka dheng kali man la ka sngi khamtam ha ka por ba wai skul ki khynnah, ka la sakhi ïa ka dheng kali kaba kham jur ka por ba wanpoi u Myntri Rangbah ka Assam, u Himanta Biswa Sarma na ka bynta ban plie ïa ka ïing jong ka Karbi Anglong Autonomous Council (KAAC) bad ban ïakynduh ïa u Myntri Rangbah u Conrad K Sangma ha Secretariat ban ïakren haba ïadei bad ki jingeh ha ki jaka khappud.
Ki kali kiba ïaid lyngba ka surok na IGP sha Barik bad na Dhanketi sha Civil Hospital ki la sahkut sbak.
Ka dheng kali ka la kham duna hadien ba la leit phai u Himanta bad ki heh ki haiñ kiba synran lang ïa u.
Ka jingtur kulmar ki ar shaka ka la nang pynjur shuh shuh ïa ka dheng kali ha kine ki jaka.
Haba peit ïa ka jinglong jingman ka dheng kali ha Shillong, ym slem shuh ba ki surok kim long shuh ban ïaid ki kali ha ki snem ban wan khamtam namarba la bun palat ki kali bad ki ar shaka.
