Shilong, Nailur:
Ka Kong Arena Hynñiewta kaba dei kyrtong ka BJP na Shella konstitwensi, East Khasi Hills District kan sa rung noh sha ka seng NPP ha ka 13 tarik mynta u bnai ha shlem treikam ka seng ha Shillong ryngkat u MLA barim ka Mawsynram kosntitwensi, Bah HM Shangpliang.
Kane ka jingthmu ka Kong Arena ban rung noh sha ka NPP ka dei hadien ba ka la wan sha ka jingïalang ka NPP ha Mawsynram kaba long ha ka Sngi Ba-ar ka 12 tarik Nailur, 2023 ha ka por ba ki nongkitkam u Bah HM Shangpliang ki la rung noh sha ka seng NPP hadien ba ki la mih noh na ka seng BJP.
Ka Kong Arena ka la ong ba kan rung beit sha ka NPP ha Shillong namar haduh mynta kam pat ïakren eiei bad ka Kong Grace Mary Kharpuri kaba dei ka kyrtong NPP na Shella konstitwensi.
Haba ïakren bad ka Kong Arena ka la ïathuh ba ka sngewtynnad ïa u Bah HM Shangpliang kaba pynlong ban wan ïadonlang ha ka jingïalang ban rung NPP ki nongkyrshan u Bah HM Shangpliang, hynrei ka la pynkhreh ban rung dkhot ba pura sha ka NPP lashai ka sngi ka 13 tarik Nailur, 2023.
“Ka jingwan ïuhkjat jong nga sha Mawsynram namar nga bud ïa u Bah HM Shangpliang namar shisien u thyrnia u la ïalam lynti u ksai u bud beit” ka la pynpaw.
Ka la pynshai ba kam don kano-kano ka jingpyrshah ïa ka seng BJP, hynrei ka jingrung sha ka NPP ka long ban ïatreilang ban wanrah ïa ki kam pynroi hapoh ka konstitwensi.
Ka la ïathuh ruh ba haduh mynta kam pat ïakynduh ïa ka Kong Grace Mary Kharpuri kaba dei ka kyrtong NPP na Shella, hynrei ka ngeit skhem ba kan ïatreilang bad ki nongkitkam ka NPP hapoh ka konstitwensi bad ka jylla.
