Tura, Nailur:
Kawei ka longkmie ba la 45 snem ka rta kaba la mynsaw ha kawei ka jingjia aksiden bad kaba donkam jingïarap, la lah ban pynurlong ha ka ban pynïoh ïa ka lad jingsumar kaba donkam kyrkieh hadien ba kawei kynhun ha ka rynsan lad pathai lyngba ka ‘WhatsApp’ ka la kner jingïarap da kaba noh synñiang katba lah ei na bynta katei ka kam ba bha.
Ka Rima Momin na Gongglanggre hapoh Garobadha, West Garo Hills ka la ïakynduh ïa ka jingjia aksiden ha Byrnihat bad ka la mynsaw jur ha ki bynta jong ki kjat.
Kumta la pynkit noh ïa ka sha Byrnihat PHC da ka Carla Sangma ha kaba ki doktor jong katei ka jaka sumar ki la phah noh ïa ka sha NEIGRIHMS.
Hynrei, namar ka jingduna ha ka ïoh ka kot bad namar bym shym la ïoh ban kynjoh sha ki bahaïing hasem, ka la buh jingeh shi kat dei na bynta ka jingsumar jong ka. Haba ym i don lad shuh da kumwei pat, ka Sangma ka la kynjoh sha kiwei pat ki kynhun ha ki rynsan lad pathai bad khatduh, kawei ka kynhun ‘WhatsApp’ na Tura ka la jubab.
Ki dkhot katei ka kynhun ba la ai kyrteng, ‘We Are The World’ ki la synñiang katba lah ei na bynta ka jingsumar ïa katei ka longkmie.
Katei ka longkmie mynta ka dang shah sumar ha NEIGRIHMS bad la khmih lynti ba shen kan sa ïoh ïa ka jingkoit.
