New Delhi, Nailur 13
Ka Dorbar Kyrpang ba san sngi jong ka Parliament ka ban long ha ka taïew ban wan kan ïakren halor ka jingdap 75 snem ka Parliament, bad haduh mynta, kam pat paw satia ba ka Sorkar Pdeng kan wanrah ïa ka aiñ rew ban pyntreikam ïa ka Uniform Civil Code (UCC) lane ban pynkylla noh ïa ka kyrteng jong ka India sha ka Bharat.
Katkum ka khubor ba la pyllait da ka Lok Sabha Secretariat ha ka Sngi Balang, la ong ba ha ka 18 tarik Nailur, kan don ka jingïakren halor ka jingdap 75 snem ka Parliament. Ka Dorbar Kyrpang kan sdang ha ka 18 tarik Nailur bad kan kut ha ka 22 tarik Nailur.
Ka Sorkar Pdeng ka la khot jingïalang bad baroh ki seng saiñpyrthei ha ka 17 tarik Nailur.
Ha kaba ïadei bad ki aiñ rew, ka Sorkar Pdeng kan wanrah ïa ka Chief Election Commissioner and other Election Commissioners (Appointment, Conditions of Service and Term of Office) Bill, Post Office Bill, Advocates (Amendment) Bill, bad ka Press and Registration of Periodicals Bill.
Ka jingpynbna da ka Lok Sabha mynta ka sngi ka long hadien ba ka la don ka jingïakren ba ka Sorkar Pdeng ka lah ban pynkylla noh ïa ka kyrteng jong ka Ri na ka India sha ka Bharat. Ka la don ruh ka jingïakren ba ka Sorkar Pdeng kan wanrah da ka aiñ rew halor ban pynlong tang kawei ka ilekshon, UCC bad ban ai bhah kyrpang ïa ki kynthei ha ki konstitwensi Assembly bad Lok Sabha.
