Shillong, Nailur 13
U Myntri Rangbah ka Assam, u Dr. Himanta Biswa Sarma ha ryngkat u Myntri Rangbah ka Meghalaya u Conrad K Sangma bad u Chief Executive Member (CEM) ka Karbi Anglong Autonomous Council, u Dr. Tuliram Ronghang ki la plie ïa ka Karbi Hemtun (Guest House) bad buh ïa u mawnongrim ban tei ïa ka jaka sah ki samla pule Karbi (hostel) kaba ngiam kumba 100 jingthiah.
La tei ïa kane ka ïing ha ka jinglut kaba kot sha ka T.21.50 klur lyngba ka tnat ba dei khmih jong ka KAAC bad kane ka ïing ka don hajan ka skul Pine Mount ha nongbah Shillong.
Ha kane ka sngi, la donlang ki kynrem ki lyndan kynthup ïa u Symbud Myntri Rangbah u Bah Sniawbhalang Dhar, u Deputy Speaker ka Assam u Numal Momin, ki MLA kiba dei na Karbi Anglong nalor u CEM ka KHADC, u Bah Pynïaid Sing Syiem bad kiwei kiwei ki heh ki haiñ.
Haba ai jingkren ha kane ka sngi, u Himanta bad u Conrad ki la ai jingïaroh markylliang ïa kine ki ar tylli ki Jylla kiba ai jingkyrshan ïa ki jaitbynriew bapher bapher kiba don ha Jylla.
U Himanta u la ai khublei ïa u Myntri Rangbah ka Meghalaya uba la kyrshan ïa ka jingïatreilang hapdeng ki ar tylli ki Jylla bad ïa ka Karbi Anglong Autonomous Council (KAAC) kaba la lah ban tei ïa ka Karbi Hemtun na ka bynta ka jingbiang jingbit ki paidbah Karbi kiba ju wan sha Shillong.
U la sngewnguh ruh ïa ka Sorkar Meghalaya bad ïa u Myntri Rangbah ha kaba u la ong ba ki paidbah Karbi bad Meghalaya ki don ka jingïajan bad ki long kum shipara bad ki paidbah ka Meghalaya, bad u Myntri Rangbah ruh u don ka jingsngewjan bad ieid ïa ki briew ka Karbi Anglong bad Assam.
Na ka liang u Myntri Rangbah ka Meghalaya u Conrad K Sangma u la ai khublei ïa u Himanta bad ïa u CEM ka KAAC bad u la ïaroh ïa ka jingtei ïa ka Karbi Hamtun bad jaka sah ki samla kaba la sdang ban pyntrei.
U Conrad u la banjur ruh halor ka jingdonkam ban don ka jingïadei bad jingïatreilang hapdeng ka Assam bad Meghalaya bad u pynpaw ruh ïa ki sienjam kiba ka Meghalaya bad Assam ki shim ban pynbeit ïa ki jaka khappud.
Haba pynpaw ïa ka jingïar jong ki paid riewlum bad jaitbynriew ha North East, u Conrad u kyrmen ban don ka jingïadei hapdeng baroh ki jaitbynriew hapdeng ka jingïapher ha ka lariti bad ka riti ka dustur.
U Conrad u la ïaroh ruh ïa u Himanta uba la peit lang ban ai jingkyrshan ïa ki jaitbynriew bapher bapher kiba ki dei hok ban ïoh ha Assam bad ka jinglut jingmut ban wanrah ki kam pynroi kiba kynthup lang ïa kiwei.
