Shillong, Nailur 13
Ka Khasi Hills Autonomous District Council (KHADC) ka la dep ban ai por haduh 7 sngi ban ai ïa ki jubab sha ki nongpynïaid jong ki khyrdop lum khajna jong ka council kaba la shah khang khyrdep noh ha ka Sngi Ba-ar ha ki bor pynïaid district jong ka Ri-Bhoi.
Na ka liang u Chief Executive Member (CEM) ka KHADC, Bah Pynïaid Sing Syiem, u la ïathuh ba ka Council ka la dep ban pan jubab lane phah da ka show cause notice sha ki nongpynïaid ïa ki khyrdop lum khajna hadien ba ka la ïoh ïa ka jingujor na ka seng ki nongñiah trok ïa ka jingleh palat jong ki khyrdop.
Lah ban pynkynmaw ba ki bor pynïaid district ka Ri Bhoi ki la khang khyrdep ïa kawei ka khyrdop lum khajna jong ka KHADC ha Umdihar kaba don ha surokbah National Highway 6, hadien ba la ïoh ïa ka jingujor ba ka don ka jingleh beaiñ.
Haba kylli halor kane, u CEM u la ong ba kitei ki khyrdop ka dei jong ka Council ha kaba la ai ban pynïaid sha ki briew shimet, bad halor ka jingujor ba la ïoh ka council ha ka taïew ba la dep ka la pan jubab hapoh 7 sngi, bad lada ka jubab na ki nongpynïaid lane ki nongshim wai kam biang ka Council da lade kam banse ban khang ïa katei ka khyrdop.
Haba kylli halor hukum jong ka Sorkar ban phah khang noh ïa baroh ki khyrdop ha shilynter ka National Highway, u Bah Pynïaid u la ong ba ki khyrdop jong ka Council kidei ba la don da ki phew snem, bad katkum ki kyndon jong ka Sixth Schedule ba la don, la aibor ïa ka Council ban don ïa ki khyrdop, kata hadien ba la mynjur da ka High Level Committee ba la khlieh da u Myntri Rangbah.
Shuh shuh u Bah Pynïaid u la ong, ba ka jingbuh ïa ki khyrdop ka long ba ki don ki kali bar Jylla kiba wan kit mar khlem da don ïa ki kot ki sla, bad bynrap shuh shuh ba ka jingbuh ïa ki khyrdop ka long katkum ka jingbiang ka jaka.
