Nongstoiñ, Nailur:
Ki paidbah ka sor Nongstoiñ lem bad katto-katne kynhun seng, ki la pynpaw ïa ka jingthrang kaba jur ba ka jingpyntrei ïa ki surok hapoh ka Nongstoiñ Town Area ha ka jingmang pisa kaba T.29 klur tam kan long ka jingtrei kaba sted, khnang ba kan long ka jingmyntoi ïa ki paidbah.
Lah ban kdew hangne ba ïa katei ka projek shna bad pynbna ïa ki surok ha sor Nongstoiñ la tip ruh kum ka ‘Upgradation/Improvement of Internal Roads of Nongstoiñ Town Area’ ha ka lynter jong ka 20.915 km halor ka projek Meghalaya Integrated Transport Project (MITP) ïa kaba la bei pisa da ka World Bank kaba la kot sha T.29 klur tam.
Shuh shuh kum ka dak jong ka jingplie ïa katei ka projek ha ka 17 tarik u Naiwieng 2022, la ïoh ruh ban plie paidbah ïa u mawnongrim ha kaba u Bah Prestone Tynsong, Myntri ka tnat PWD ha ka sorkar kaba la leit noh u la long u kongsan.
Halor katei ka projek haba kren bad u nongthoh khubor u samla Mawkordor Kharsyiemlieh, President ka Ri Khasi Sepngi Federation (RKSF) Sengkmie u la ong, ka RKSF ha kine ki khyndiat sngi ba la dep ka la leit ruh ban jurip. Ha kane ka jingjurip la ïohi ba la jan baroh ki surok ha Nongstoiñ Town ki la sniew. Kumta ka RKSF ka kyntu jur ïa u kontraktor uba ïoh pyntrei ïa kane ka projek ba un ïaleh ban kham pynsted ïa ka jingpyntrei khnang ba kan long ka jingbit jingbiang ïa ka ïaid ka ïeng ki paidbah.
