Shillong, Nailur 13
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem, ha ka Sngi Balang u la ïoh ban aiti noh ïa ka trok kit ñiut sha ka Hima Mylliem ha ka jingïalang ba la pynlong ha basa sohsaw ha Ïewduh.
Ka jingaiti ïa kane ka trok kit ñiut ïa kaba la pynïoh lyngba ka Chief Minister’s Special Development Fund (CMSDF) 2023-24, ka long na ka bynta ban wanrah ïa ka khuid ka suba hapoh Ïewduh, khamtam lei hadien ba ki kali kit ñiut ka Hima Mylliem ki la rim bad thut.
Ïa kane ka kali kit ñiut la pyllait bad aiti da u CEM ryngkat ka jingïadon lang u EM ba khmih ïa ka tnat Health and Sanitation ka KHADC u Bah Victor Rani, ki ophisar na ka Council sha ka Hima Mylliem ba la ïadon lang da u Syiem ka Hima Mylliem Paiem Ainam Manik Syiem, ki Basan, Bakhraw bad ki Myntri lem bad ki nongshong ïew kiba la pynphuh pynphieng ïa kane ka jingïalang.
Kane ka jingpynïoh ïa kane ka kali kit ñiut ka long tang hadien ar taïew ba ka executive committee ka leit ban jurip ïa ka ïewduh.
Na ka liang u CEM haba kren ha kane ka sngi u la pynpaw ba ka executive committee ka shimkhia ha ka ban wanrah ïa ka khuid ka suba hapoh Ïewduh bad kumjuh ha kiwei ki jaka kiba hap hapoh ka jingkhmih ka KHADC. U la ai burom ruh ïa u Myntri Rangbah namar ka jingshim khia ban sngap bad ai ïa katei ka kali na ka bynta ka bit ka biang ki paidbah nongshong ïew.
Ha kajuh ka por u CEM u la pyntip ba na ka liang ka Council lyngba ka tnat kaba dei peit, kan sa ïakren ruh ba nalor ka khuid ka suba ban wanrah ha Ïewduh, yn sa nang pynbha bad pynbun ïa ki jaka leit shabar na ka bynta ka bit ka biang jong ki nongleit ïew leit hat bad ki nongshong dukan, yn sa pyndait ruh da ki kor CCTV bad ruh ban pyndait da ki bording da ka solar ban wanrah jingshai ha ki por miet ba kan long ka jingshngaiñ ïa ki nongshong dukan bad ki nongleit nongwan.
Na ka liang u Pa’iem Ainam Manik Syiem u la ong ba kane ka jingïoh kali thymmai ban pyndonkam ki nongshong die jingdie ha Ïewduh ka dei namar ka jingtrei shitom u CEM ka KHADC ban pynïoh skhim lyngba ka Chief Minister Special Development Fund (CMSDF).
