Shillong, Nailur 14
Ka jingrakhe ïa ka Sngi Burom ba 90 jong ka Seng ki Khynnah Skul Barim jong u Don Bosco yn pynlong ha ka Sngi U Trai, ka 17 tarik Nailur, 2023 naduh ka por 8 baje mynstep ha Don Bosco Technical School, Laitumkhrah, Shillong.
Ïa ka Sngi Burom jong ki Khynnah Skul la pynlong man la ka snem khlem pynpep, naduh ka snem 1932. Dei tang ha ka snem 2021, namar ka jingpang COVID-19 bad ka jingpynjari ïa ka aiñ ba mana ban pynlong jingïalang paidbah, ïa ka Sngi Burom ki Khynnah Skul Barim u Don Bosco, ym shym la lah ban pynlong.
Ka prokram ba la pynbeit na ka bynta ka Sngi u Trai ka kynthup ïa ka jingpynrung ïa ki kyrteng jong ki khynnah skul barim kiba wan sha kane ka sngi burom, ka Mass Bakhuid, ka General Body Meeting, ban tip kiei ki prokram kiba ka seng ka la ïoh ban pynlong ha ka snem ba la dep bad ruh ban ïakren halor ki prokram kiba ka seng ka thmu ban pynlong ha ka snem ban wan.
Kumba ju long ha kiwei ki snem, ha kane ka kynti ruh la mang ka por bakyrpang ban pynlong ïa ki jingïarwai bad jingïashad kmen sngewbha da ki khynnah skul barim u Don Bosco.
Kawei na ki jingthmu jong ka jingpynlong ïa ka Sngi Burom ki Khynnah Skul Barim u Don Bosco, ka long ban plie lad ïa ki khynnah skul barim ban pynthymmai bad pynkhlaiñ ïa ka mynsiem ïa long shipara katkum ki kyntien phira (Motto) jong ka seng kaba ong: “Ban tip, ieid, ïarap iwei ïa iwei, bad ban long kiba tylli mlon kawei.”
