Shillong, Nailur 14
Ka jingpynkhreh ïa ka ilekshon MDC ka ban long la shem snem (2024) ka la ïaid shaid shaid namar kiba kwah ban pan tiket na ka Voice of the People Party (VPP) na Mawkhar-Pynthorumkhrah konstitwensi ki don haduh saw ngut bad na Jaïaw konstitwensi ki don san ngut.
Ka Mawkhar-Pynthorumkhrah shiteng ka hap sha North Shillong konstitwensi kaba la mihkhmat da u MLA ka VPP, Bah Adelbert Nongrum bad shiteng ka hap sha Pynthorumkhrah ba la mihkhmat da u MLA ka BJP, Bah A.L Hek.
Katba ka Jaïaw konstitwensi pat shiteng ka hap sha North Shillong konstitwensi kaba la mihkhmat da u MLA ka VPP, Bah Adelbert Nongrum bad shiteng ka hap sha West Shillong konstitwensi ba la mihkhmat da u Bah Paul Lyngdoh kum MLA na UDP.
Haba pynthikna ïa kane ka jingpan tiket na ka seng VPP, la ïoh ban ïakren bad u Secretary ka VPP State Election Committee, Bah Londoner Sohtun uba la pynthikna ba ki don san ngut na Jaïaw bad saw ngut na Pynthorumkhrah-Mawkhar konstitwensi, hynrei ïa kine ym pat lah ban pynpaw kyrteng.
U la ïathuh ba kine kiba pan tiket ki dei kiba la phah da ka jingthoh sha ka Election Committee bad ka committee kan sa shim ïa ka rai.
Nalor kane, u Bah Londoner u la kyntait ban jubab ïa kiwei ki konstitwensi namar u hap ban peit ïa ki kot ki sla namar ki la bun kiba la pan tiket na ka seng VPP.
Kumta, u don jingkyrmen ba ynda ka State Election Committee ka la shong jingïalang kan sa lah ban ai ïa ki kyrteng jong ki kyrtong kiba pan tiket ban ïakhun na ka seng VPP ha kane ka ilekshon MDC ka ban long ha u snem 2024.
