Khliehriat, Nailur:
Ka Joint Action Committee (JAC) Wapung C&RD Block, kaba kynthup ïa ka Dorbar Shnong Wapungskur bad Dorbar Shnong Wapungshnong, ka la pynpaw ïa ka jinglyngngoh bad dawa jingpynshai ruh na ka sorkar halor ka jingrah jyndat biang jong ka, ïa ka shlem treikam ba shipor jong ka Wapung C&RD Block na Wapungskur sha Khliehriat khlem da tip ïa ki daw lane kynjoh ktien ïa ka JAC Wapung C&RD Block, ïa ka Dorbar Shnong Wapungskur bad ïa ka Dorbar Shnong Wapungshnong, kiba la ïadon bynta naduh ba sdang bad haduh ba wanrah ïa katei ka Wapung C&RD Block na Khliehriat sha ka thaiñ Wapung.
Ha ka jingshisha katkum ba long mynta, namar bym pat dep ka jingtei ïa ka shlem treikam ba pura jong ka Wapung C&RD Block ha ka jaka kaba ka shnong Wapungskur bad ka Wapungshnong ki la ai sngewbha sha ka Sorkar Jylla na ka bynta katei ka shlem treikam paidbah, la rah shwa shipor ïa ka shlem treikam bashipor jong katei ka shlem treikam ha kawei ka ïing kaba don ha ka shnong Wapungskur ha u Lber, 2022. Bad naduh utei u snem haduh ka 7 tarik mynta u bnai katei ka shlem treikam ha katei ka jaka bad ïing ka ai ïa ka jingshakri ïa u paidbah jong ka block.
Hynrei kyndit-kynsan ha ka 8 tarik mynta u bnai pat la lap ba ïa katei ka shlem treikam la rah noh biang sha ka Nongbah Khliehriat khlem da pyntip sha ka JAC, Wapung C&RD Block lane sha ka Dorbar Shnong Wapungskur bad ka Dorbar Shnong Wapungshnong halor kaei ka nongrim ba hap ban leh kumtei.
Ha katei hi kajuh ka sngi ba rah ïa ki tiar ki tar jong katei ka shlem treikam, ki nongïalam jong ka JAC Wapung C&RD Block, ki la pyrshang ban wad ïa ka daw halor ka jingrah biang ïa katei ka shlem treikam kaba la don mynta la shisnem shiteng ha Wapungskur da kaba pyrshang ban phone sha u Block Development Officer ba dei peit ïa katei ka block, hynrei u khlem shim satia ïa ka phone bad la wad jingtip biang ruh da kaba kylli da ka ‘message’ lyngba ka whatsapp hynrei ïa kata ruh u khlem jubab.
Ka long kaba lyngngoh ba kumno ka Wapung C&RD Block, ka shlem treikam kaba ki ar Dorbar Shnong- Wapungskur bad Wapungshnong, ki la ïa don ka bynta kaba khraw ha ka ban wanrah ïa katei ka shlem treikam sha ka thaiñ Wapung da kaba ai ei ruh ïa ka jaka kaba heh bha na ka bynta ban tei ïa ka shlem treikam bad jaka sah ba paka jong katei ka block, hynrei ynda la rah biang ïa ka na ka thaiñ Wapung sha Khliehriat, ka Dorbar Shnong jong kitei ki ar shnong bad ka JAC Wapung C&RD Block ki khlem tip eiei shuh. La suba jur ba imat ka don kaei-re-kaei sha lyndet halor kane ka jingleh jong ka sorkar kumne.
Kumta khnang ba ka JAC Wapung C&RD Block, ka Dorbar Shnong Wapungskur bad ka Dorbar Shnong Wapungshnong bad u paidbah baroh, kin dup shai kdar, la dawa ba ka sorkar lane kino kino ki bor ba dei peit ïa kane, kin hap ban ai ïa ka jingpynshai kaba shai kdar ba na kaei ka daw pat ba la rah biang mynta ïa katei ka shlem treikam bashipor jong katei ka block sha Khliehriat.
Ka JAC Wapung C&RD Block kan ym shong kli- kti da lei lei ruh em ha ka jingïadei bad kane ka kam, hynrei kan ïai buddien ïa kane tat haduh ba kane ka kam kan da shai kdar bad ruh wanrah biang ïa katei ka shlem treikam bashipor jong ka Wapung C&RD block ha Wapungskur hi, ka jaka ha kaba ka shlem treikam ba pura jong katei ka block kan don katkum ba la pynbna da ka sorkar.
Ïa kane ka kyrwoh la pyllait da u Secretary ka JAC Wapung C&RD Block, u Hercules Mutyen, u Waheh Shnong ka Wapungskur, u Deolangki Dkhar bad u Waheh Shnong ka Wapungshnong, u Kduplang Ryngkhlem.
