Khliehriat, Nailur 14
Ka jingpynkhuid ïa ka met ba sah jong ka longkmie, ka Kong Priskila Suchiang kaba na Donaskur, East Jaiñtia Hills District la pyndep noh ha ka 13 tarik Nailur ha u lum jingtep ka Balang Presbyterian hapdeng ka jingjaw ki ummat kthang.
Ka longkmie Priskila ka dei kaba la suba shah pynïap dusmon ha ki suba khar Bangladesh kiba ju khaïi-pateng bad ka ha khappud India Bangladesh ha katei ka thaiñ.
Ha syndah jong ka synduk, ki bahaïing hasem jong ka, ki la thep lang ïa ki tiar ki tar ba kane ka longkmie ka ju pyndonkam.
Kum ban shu pynkynmaw kane ka jingjia shah pynïap ka longkmie ka la jia ha ka 11 tarik mynta u bnai ha ka por kumba 11 baje mynstep ha ka jaka kaba jngai tang kumba 2 kynta na shnong Donaskur, East Jaiñtia Hills District.
Kane ka longkmie ka la iehnoh shadien ïa arngut ki khun.
Ha ka sngi kaba kane ka longkmie ka la shah pynïap, katkum ka jingïathuh jong ki trai shnong, kane ka longkmie lem bad u khun shynrang ki la mih ban ïaid da ka kjat haduh ban da poi ha kawei ka ïing trep kaba katei ka longkmie ka ju shongthait.
Hynrei une u khun jong ka, u la ong ïa la ka kmie ba kan shong shiphang bad ma u un leit wad lynti ban pynpoi ïa ki mar. Hadien ba u la wanphai sha kajuh ka jaka u la shem pynban ba ka kmie jong u ka la thiah lyngktar ha madan ha ryngkat ka jinglyngkien jong ka snam.
Ha kaba kum kane ka por la ong ba une u khun u la pyrta lynñiar bad mareh ban pyrta briew. Na ka liang ki nongshong shnong ruh kiba la wan poi bran-bran ha katei ka jaka ki la lap ba ïa ka met jong katei ka longkmie la mait dusmon da ka wait ïa ka durkhmat bad na ki kti ki kjat lyngkhot-lyngkhot.
La ong ba kane ka rukom pynïap ka long kaba shyrkhei bad itriem shisha kumba la ïathuh da ki trai shnong.
