Shillong, Nailur:
Ha ka jingplie paidbah (virtual launch) ïa ka ‘Ayushman Bhava’ hapoh ka ri da ka President ka India, ka Droupadi Murmu, u Myntri Rangbah ka Jylla, u Conrad K. Sangma ha ka Sngi Balang u la ïashim bynta lang ha katei ka jingplie paidbah ha ka Jylla ha ka jingïalang kaba la long ha State Convention Centre ha ryngkat ka jingdonlang ka Myntri ka tnad ka koit ka khiah, Dr. M. Ampareen Lyngdoh lem bad kiwei ki heh ophisar ka tnad.
Haba ai jingkren, u Sangma u la ong ba ka roi ka par kan ym don jingmut lada ka Sorkar kam lah ban pynbiang ïa ki jingdonkam ha ka liang ka koit ka khiah ha ki shnong ki thaw.
U Myntri Rangbah u la ong ruh ba ka koit ka khiah kam dei tang ka jingkitkhlieh jong ka Sorkar hynrei ka jingkoit jingkhiah kaba bha ka sdang na ïingsah jong u briew shimet.
“Ka koit ka khiah ka sdang da ka jinglehkhuid ha ïing ha sem, ha shnong ha thaw bad ka thaiñ bad kumta ki kyrdan bapher-bapher jong ka imlang-sahlang ki don ka bynta bad ka jingkitkhlieh ka ban pyntikna ba man ki nongshong shnong hapoh ka Jylla ki long kiba khiah krat bad kumta ka jingïadon bynta lang jong kito kiba don ka jingsngewkhia ka long kaba donkam eh,” u la ong.
U la pynbna ruh ban ai ka jingkyrshan pisa kaba T.20,000 sha man la ki Village Health Council (VHC) kiba trei shit rhem ban kyrshan ïa ki kam jong ki VHC.
U la ong ruh ba ka mang tyngka na bynta ka tnad ka koit ka khiah ka long kaba heh bha bad ka Sorkar ka buddien ïa ka tnad ka koit khiah ha ryngkat ka jingminot, jingtreikam bad ka jingkyrshan pisa kaba pura.
U la ong ruh ba wat la ki don kiba bun ki jingtynjuh ha ka tnad ka koit ka khiah, ka Sorkar ka trei na bynta ban khmih bniah ïa kine ki jingtynjuh.
“Ka jingkyntiew kyrdan ïa ki Sub-Centre, CHC, PHC bad ki mat ha ki distrik aspatal kum ka jingduna ki jingdonkam ha ka liang ka um, bording, dawai, jingai jinghikai ïa ki nongtrei, ki tiar ki tar bad ka jingpynpoi mar ki long ki mat kaba ngi la shim khia khnang ba ngi lah ban pynbha ïa ka jingtreikam jong ki jaka sumar,” u la ong.
Na ka liang u Myntri Rangbah, u la pyllait ruh ïa ka ‘Village Health Council-IEC Book’, ‘Register’ kumjuh ïa ka ‘VHC App’ bad sam khusnam sha kito kiba leh bha ha ki prokram VHC/TB/MHIS. Ha kane ka sngi la ïadonlang ruh ki ASHA, nongtrei ka koit ka khiah bad ki dkhot ka VHC na kylleng ka Jylla.
Ïa ka ‘Ayushman Bhava’ kaba la plie ha kane ka sngi la wanrah ha ka Seva Pakhwada (Service Fortnight) naduh ka 17 tarik u Nailur bad kan kut ha ka 2 tarik u Risaw.
Ha kajuh ka por, yn sam ruh ïa ki ‘Ayushman Bharat Card’ sha kumba 60,000 ngut ki nongïoh jingmyntoi.
Kane ka dei ka skhim ka koit ka khiah ba la kyrshan da ka Sorkar kaba thmu ban pynbiang ïa ka jingsumar kaba paka, kaba bit dor bad kaba suk na bynta ki nongshong shnong ha kylleng ka India.
Shuh shuh kane ka skhim kan dei na bynta baroh ki nongshong shnong ka India khlem da peit ïa ka jingïoh ne kyrdan jong ki.
Nalor kane, kito kiba shitom na ki jingpang kiba jur ki lah ban ïoh bynta ïa katei ka skhim. Kane ka skhim kan kynthup ruh ïa kito ki bym kot bor na bynta ki jingsumar kiba donkam.
