Tura, Nailur 14
Ki pulit ka West Garo Hills ha ka Sngi Palei ki la ai hukum ban tohkit hadien ba ka dur jong kawei ka samla kaba na ki thaiñ Rongkhon Songgital ka la paw ha kaba la ïohi ba kane ka samla ka la don hapdeng ka jingmynsaw na ki bynta jong ka khlieh.
Ha ka step Sngi Palei, ki nongkynthoh ha ‘Social Media’ ki la kam ba katei ka samla ba dang 20 snem ka rta ka la shah shoh ha kumba lai ngut ki pulit ha kaba ki la tied na khlieh jong ka da ki bilor ‘beer’. Hynrei ki pulit ka West Garo Hills ki la kyntait war ïa kane ka jingkam, bad ki la phah tohkit ban lap ïa ki jingshisha.
U SP ka West Garo Hills, u Abraham T Sangma, u la ong ba ha ka miet Sngi Balang, shi kynhun ki samla shynrang bad kynthei ki la ïaleh sngewbha hajan ka jaka tep briew ha ka thaiñ Rongkhon Songgital. La kam ba kita kiba la don ha kane ka jingïaleh sngewbha ki la ïa buaid kyiad.
“Hadien ba ka ïoh pdiang ïa ka jingujor, shi kynhun ki pulit hapoh ka jingïalam jong uwei u Sub-Inspector na Araimile Beat House ki la leit sha katei ka jaka bad la shem ba ki jingujor ba la ïoh ki long kiba shisha. Mar ïa ïohi ïa ki pulit, ki la don kiba la phet noh tangba ki don ruh kiba khlem phet bad namarkata, ki pulit ki la hap ban pyndonkam khyndiat ka bor,” la ong u SP da kaba bynrap ba ki pulit ki la mih noh na katei ka jaka hadien ba kita ki nongleh sngewbha ki la ïa phet.
Hynrei dei tat haduh mynta ka step ba ka dur jong katei ka samla ka la saphriang ha kaba la paw ba ka la mynsaw na ki bynta jong ka khlieh.
U SP u la ïathuh ba hadien ka jingwad bniah, la lap ïa katei ka samla kaba dei kaba dang pule. “Ngi la pyrshang ban kylli na ka kumno ka mynsaw, hynrei ka khlem treh ban ïathuh kaei kaba la jia bad ka khlem ïathuh ruh mano ki paralok jong ka kiba la don lang bad ka. Ngi la shim ïa kaei kaba ka la ïathuh ha ka jingdonlang ki kmie ki kpa jong ka,” la ong u Abraham.
Nalorkata, u SP u la ïathuh ba katei ka samla ka la kyntait ïa ka jingkynnoh ba dei ki pulit kiba la shoh la dat ïa ka da ki bilor ‘beer’ lane da kiwei pat ki rukom.
“Ngi la thung da ka jingtohkit ban khlieh da u ophisar uba bat ïa ka kyrdan Dy SP, bad ïa ka jingtohkit la aiti sha ka Women’s Police Cell. Ngi kyrmen ba katei ka samla kan sa ïathuh ïa kaei kaba la jia bad hadien kata, ngin sa leh ïa kaba donkam,” la ong u Abraham.
