Shillong, Nailur 14
U Chief Executive Member ka Khasi Hills Autonomous District Council (KHADC) Bah Pynïaid Sing Syiem u la ïathuh ba u Chief Executive Member ka Karbi Anglong Autonomous District Council (KAADC) u Dr. Tuliram Ronghang u kloi ban ïatreilang bad ki Khasi halor ka jingkajia ha shnong Lapangap kaba hap ha West Jaiñtia Hills District.
Kane ka jingïathuh u Bah Pynïaid ka dei hadien ba u CEM ka KAADC ryngkat bad 12 ngut ki MDC bad u MP jong ki u Horensing Bey ki la wan ïakynduh ïa u mynta ka sngi ha shlem treikam ka KHADC ha Shillong ha ka jingïadonlang ki MDC ka KHADC.
Haba ïakren bad ki nongthoh khubor u Bah pynïaid u ong ba wat la ka Lapangap kam hap ha u pud u sam ka KHADC, hynrei namar ka dei kajuh ka jaidbynriew u la kren ïa ka jingïakajia ha katei ka shnong ban wanrah ka jingshong suk bad ha kiwei ki shnong khappud.
U la ong kumba ka jylla Assam bad Meghalaya ki la dep pynbeit ïa u pud u sam ha ka sien kaba nyngkong. Mynta haba la ïaid sa ka bynta kaba ar, u kwah ba ka jingïapynbeit pud kan long da ka jingïasngewthuh jingmut hapdeng ki ar tylli ki jaidbynriew kata ki Khasi bad ki Karbi.
Nalor kane, u la ïathuh ba ki don haduh 23 tylli ki shnong Khasi kiba don ha khappud hadien ba u la ïoh jingtip ha ka por ba u leit jurip ïa ki shnong mar shu shimti kum u CEM ka KHADC.
Ha kajuh ka por u la ïathuh ba un sa leit jurip lang ïa ka Block-1 ha ka jingïadonlang u CEM ka Jaiñtia Hills Autonomous District Council (JHADC) bad nangne ma u ryngkat ki MDC ka KHADC kin leit sha shlem treikam ka Karbi Anglong Autonomous District Council ha Diphu.
Namar kata, u Bah Pynïaid u don jingkyrmen kaba skhem ba ka jingïapynbeit pud kan long kaba seisoh da ka jingwanrah ha ka miej jingïakren.
