Khliehriat, Nailur 14
Ka East Jaiñtia Hills Truck Owner & Transporter Association (EJHTOTA) ka ai ïa ka jingkyrshan kaba pura ïa ka Synjuk Waheh Shnong East Jaiñtia Hills District bad ïa ka Khasi Students’ Union (KSU) Narpuh Circle halor ka jingaipor jong ki ïa ka sorkar ba kan maramot noh wut-wut ïa ka surok National Highway-6, kaba la sniew shaba palat pud.
Ha ka kyrwoh ba la phah da u President ka EJHTOTA u Bah Kyrshan Dkhar u la ong, ka surok NH-6 ka dei u thied snam bah ym tang jong ka jylla Meghalaya, hynrei jong kiwei pat ki jylla ka thaiñ shatei lam-mihngi jong ka Ri India. Ka jingsniew palat jong kane ka surok ym tang ba ka la ktah matïong ïa ki paidbah nongleit nongwan, hynrei ka la buh ruh ha ka jingma kaba khraw bha ïa ki kali bad khamtam eh ïa ki mynsiem briew ba kordor, kiba dei ïaid lyngba jong kane ka surok.
“Ka nam te National Highway, tangba ka kam pat tang kum ka surok shnong ruh ym ikop, ki paidbah mynta ki la sah ha ka jingdum namar kim tip don aïu sha lyndet, kat haduh ba ki bor sorkar ba dei peit ïa kane ka surok ki la shu ieh beiñ shisha haduh katne katne, i kumba ki paidbah ba don kali ki khlem siew ïa ki khajna surok, kat haduh ba ki kali naduh kiba heh haduh kiba rit tam kim long shuh ban ïaid lynti lyngba jong kane ka surok”, ‘ la ong u Bah Kyrshan Dkhar.
Nalor kane, u la ong ki paidbah ki la bitar jur bha halor ka jinglong jingman jong kane ka surok NH-6. Kumta na ka bynta ka bha ka miat jong u paidbah, ha ka jingïadei bad ka jingsniew palat jong kane ka surok, ka EJHTOTA, ka dawa na ki bor ba dei peit naduh ka sorkar jylla haduh ka sorkar pdeng ba ki dei ban maramot noh wut wut ïa ka surok.
Namar kata, ka EJHTOTA, ka ai ïa ka jingkyrshan kaba pura ïa ka SWS East Jaiñtia Hills District bad ka KSU Narpuh Circle kiba la ïaid lypa shakhmat ban ai por ïa ki bor ba dei peit ban maramot noh wut-wut ïa ka surok, la pynkut ka kyrwoh.
