Jowai, Nailur:
Ïa ka jingïalap halor ka ‘Ayushman Bhava’ la plie da u Dr Brighstar Langbang Block Development Officer ka Thadlaskeiñ C&RD Block, West Jaiñtia Hills District ha ka sngi Balang hapoh Ummulong CHC ha ka jingdon ryngkat u Dr. Marshall Lamare, Block Medical Officer, Kong Acquilla M Lamin, Block Programme Manager National Health Mission, ki Medical Officers, ki dkhot jong ka Village Health Council hapoh ka Thadlaskeiñ block bad ki nongtrei ka koit ka khiah bad kiwei kiwei.
Kane ka jingïalap halor ka ‘Ayushman Bhava’ ka ban long ka jingkyrkhu kaba khraw ïa baroh ban im slem da kaba sumar ïa ka koit ka khiah.
Ha kane ka jingïalang la ai jingkren da ka Kong Acquilla M Lamin kaba la pynshai ïa ki lai tylli ki jingthmu jong ka Ayushman Bhavah. Kine ki kynthup ïa ka na ka bynta ban sam ïa ki Ayushman Card sha ki nongshong shnong, ban pynlong ïa ki Health Mela ha ki Health & Welness bad Community Health Centres bad ka jingïatreilang ki Village Health Council ban pynlong ïa ki ‘Awareness Program’ shaphang baroh ki skhim bad ki lad jingsumar lyngba ka tnat ka koit ka khiah.
Ha kane ka prokram la sam ruh ïa ka khusnam “Best Performing Village Health Council” sha ka shnong Nongjngi kaba don hapoh Thadlaskein Block bad la sam ruh ïa ka Meghalaya Health Insurance Scheme Card bad Ayushman Bharat Digital Mission Card sha ki katto katne ngut ki nongshong shnong hapoh Thadlaskein Block kum ka dak ka jingplie ïa ka Ayushman Bhava.
Kum shi bynta ka jingplie ïa ka Ayushman Bhavah la pynlong ruh ïa ka screening na ka bynta ka jingpang TB, Hypertension, Diabetes Oral bad Breast Cancer. Nalor kata, ka la don ruh ka jingshondur MHIS Card bad ABHA Card.
