Shillong, Nailur 14
Ki seng kiba don ha ka Liang Pyrshah ki la pynkhreh ban ther ïa ka Sorkar ha Ïingdorbar Thawaiñ ha ka Dorbar Synrai ka ban sdang naduh ka sngi Thohdieng na bynta san sngi haduh ka 22 tarik mynta u Nailur.
Ka Dorbar Synrai ka dei ka dorbar ba-ar jong kane ka Ïingdorbar Thawaiñ kaba khatwei ka Jylla.
Ka Sorkar Meghalaya Democratic Alliance (MDA-II) ka dei kaba don ha ka jingbunpaid bad ki seng kiba don ha ka Liang Pyrshah ki kynthup ïa ka Congress, Trinamool Congress bad Voice of the People Party (VPP) ki la pynkhreh ban ther ïa ka Sorkar ha Ïingdorbar.
Ka Congress ha kane ka dorbar kan sa wanrah da ka ‘resolution’ ban pyrshah ïa ka jingthmu pyntreikam ïa ka Uniform Civil Code (UCC), hynrei u Myntri Rangbah u Conrad K Sangma u la dep ong lypa ba ym pat tip yn pyrshah ïa kaei namar khlem pat ïohi ïa ka aiñ-rew haba ïadei bad ka UCC.
U la ong ruh ba lada dei ba ha ka UCC ka ong ban shim jait na ka kmie ha India, ka Meghalaya kan dei kaba nyngkong ban pdiang ïa ka UCC.
U Nongïalam ka Liang Pyrshah u Bah Ronnie V Lyngdoh u la ong ba namar ki sngi shong dorbar ki lyngkot, yn nym ïoh por ban rah bun tylli ki mat ha kane ka dorbar.
Na ki san sngi ba shong dorbar, lai sngi la mang na ka bynta ka Sorkar ban pyndep ïa ki kam ha Ïingdorbar bad ar sngi na ka bynta ki dkhot jong ka Ïingdorbar ban wanrah ïa ki mat ban kren ha ka dorbar.
Na ka liang ka VPP ka la wohdong halor ka jinglyngkot palat ki sngi shong dorbar bad u MLA ka Mawryngkneng u Bah Heaving Stone Kharpran, uba dei u Parliamentary Party Secretary ka VPP u la kyrpad ïa u Lamphang ka Ïingdorbar Thawaiñ u Thomas Sangma ban kham pynjlan shuh shuh ïa ki sngi shong dorbar khnang ba yn lah ban ïoh ïakren kham bun ïa ki mat hapoh Ïingdorbar.
