Nongstoiñ, Nailur:
Ka jingbym pat lah ban pyntreikam bha khamtam ban wanrah ïa ki tnat treikam bapher bapher hapoh ka Mawshynrut Civil Sub Division kaba la jan kynjoh mynta sha hynñiew snem naduh ba la plie, kumjuh ruh ka jingbym pat treikam ka Shallang C&RD Block naduh ba la plie ïa ka, ka la pynlong ka jingeh kaba khraw ïa ki paidbah ka thaiñ Mawshynrut kiba don ïa ka jingangnud ba lyngba ka jingïoh ïa ka Civil Sub Division bad ka Shallang Block kan pynsuk ïa ki.
Ïa kane la pynpaw biang da ka Federation of Khasi Jaiñtia & Garo People (FKJGP) Mawshynrut Circle ha ka 13 tarik u Nailur 2023, hadien ba ka la leit ban ïakynduh biang ïa u Deputy Commissioner ka West Khasi Hills ban ïakren halor ki jingeh ba ki paidbah ki ïakynduh ha kaba ïadei bad ka Mawshynrut Civil Sub Division.
U Bah Eveningstar Marthong, General Secretary FKJGP Mawshynrut circle bad u Bah Cary Kharmutee, Vice President FKJGP West Khasi Hills District ha ka jingdonlang kiwei ki nongkitkam ki la ong ba ha ka jingïakynduh bad u DC, ka FKJGP ka la ïoh ban buh ki jingdawa bad jingkyrpad ba un shimkhia ïa ka Mawshynrut Civil Sub Division namar kumba long mynta kane ka Civil Sub Division kaba la jan kynjoh sha ka 7 snem, kam pat biang ki tnat treikam ka sorkar kum ka supply, election, registration bad kiwei kiwei kaba wanrah ka jingeh ïa ki paidbah.
Kitei ki nongkitkam ki la ong ruh ba ha kaba ïadei bad ka Shallang Block kaba la dep plie bad mang da ka sorkar haduh mynta ym pat lah ban pyntreikam bad kane ka wanrah jingeh kaba khraw ïa ki paidbah.
Shuh shuh ki la ong ruh ba FKJGP ka kyntu ïa u MLA ka thaiñ ba un shim khia ban peit halor kane ka bynta kaba ki paidbah ki ïakynduh ïa ki jingeh.
