Shillong, Nailur 14
Ka Sorkar Jylla ka dang ap mynta ïa ka jubab na ka liang jong ka seng kieng atiar ka Hynñiewtrep National Liberation Council (HNLC) na ka bynta ban lah pynïaid biang shakhmat ïa ka kam jong ka jingïakren ïasuk.
“Ngi dang ap ïa ka jubab na ka HNLC khnang ba ngin lah pat ban nang pynïaid noh ïa ka kam ïakren ïasuk shakhmat,” la ong u Myntri Rangbah ka Jylla, Conrad K Sangma haba kren sha ki lad pathai khubor ha ka sngi Palei.
U Myntri Rangbah u la ban jur ïa ka jingdonkam ban don ka jingïakren kaba shitrhem na baroh ki liang kiba don ha ka miej ïakren ïasuk. U la kdew ba baroh ki kynhun ki dei ban pyni ïa ka jingshem jingmut haba ïadei bad ka jingïakren ïasuk.
Ha kajuh ka por, na ka liang jong u Conrad u la pyntip ba ka Sorkar ka la dep ban phah ïa ki katto katne ki mat ba kongsan sha ka HNLC. Kumta ynda la ïoh ïa ka jubab na ka seng, ka Sorkar kan sa pynïaid biang shakhmat ïa ka jingïakren.
Lah ban pynkynmaw ba dang shen, u Symbud Myntri Rangbah ka Jylla, Bah Prestone Tynsong uba khmih ruh ïa ka tnat Kam Pohïing u la ïathuh ba ka Sorkar Jylla bad Sorkar Pdeng, ki la buh kyndon ba u Chairman bad u General Secretary jong ka HNLC, ki dei ban ïadonlang noh ha ka jingïalang ïakren ïasuk.
Shuh shuh u Myntri Rangbah u la pynpaw ba katba dang jam shakhmat, ki don katto katne ki kam ba sngewkhia, katto katne na ka liang jong ka HNLC bad katto katne na ka liang jong ka Sorkar, ha kaba na ka liang jong ka sorkar ka dang ïakhmih mynta ba kumno kan leh ïa kine kiei kiei baroh.
Haba kylli halor ba charge-sheet ka National Investigation Agency (NIA) pyrshah ïa ki nongïalam ka HNLC, u Conrad u la pynshai ba kine ki dei ki case barim jong ka Sorkar Pdeng ym jong ka Sorkar Jylla bad ka Sorkar Jylla ka la dep ban pyntip sha ka HNLC halor kane.
