Shillong, Nailur:
Ka State BJP Mahila Morcha, Meghalaya ka pynpaw ïa ka jingkyndit kaba khraw halor ka jingshah pynïap dusmon jong kawei ka longkmie lui-lui ba la tip kyrteng kum ka Priskila Suchiang (45 snem ka rta) ha ka shnong Donaskur, Elaka Narpuh ha ka 11 tarik mynta u bnai.
“Ngi phah ka kyrwoh sngewlem sha ki 2 ngut ki khun jong ka Kong Priskila Suchiang, ki bahaïing hasem bad kiba ieid ba thoiñ,” la ong ka kyrwoh na ka seng.
Haba kdew ba katei ka jingjia ka long ka bym lah pdiang satia, ka seng ka la ong ba ka pang ka mynsiem hadien jong katei ka jingjia ba shyrkhei bad pynrem jur ïa ka naba ka pyni ïa ka jingbym kheiñ snep shuh ïa ka hok ban im kumba la kdew ha ka Riti Synshar ka Ri.
“Ka jingpynïap dusmon ïa ki kynthei ka long ka bym lah pdiang bad ngi ïeng skhem tylli kawei bad baroh ki kynthei jong ka Jylla. Ka jingshah pynïap ka Kong Priskila Suchiang ka kdew ïa ka kam sniew kaba ktah ïa ka imlang-sahlang jong ngi – bad ka pynkhlaiñ ïa ka jingdonkam ban bteng ïa ka sienjam ban kiar na kane ka jingpang ha ka Jylla jong ngi,” la ong ka kyrwoh.
Ka seng ka la ong ruh ba ka don ka jingshaniah ha ka ‘Criminal Justice System’ ka India bad ka kyntu ïa kino-kino kiba don jingtip ban wan shakhmat ha ka ban ïarap haba ïadei bad ka jingtohkit.
Shuh shuh ka State President ka BJP Mahila Morcha, Kong Susuki Pariat ka pynrem jur halor ka jingshah pynïap ba shyrkhei ka kmie ba 45 snem ka rta jong 2 ngut ki khun bad ong, “Ka jingshah pynïap kaba itriem jong ki kynthei kum kane ka long kaba pynkyndit ïa ngi bad kumta ngi hap ban leh ïa kaba donkam, kum ka imlang-sahlang ban pyllait im bad ban rat dyngkhong ïa ki kam sniew.”
“Ngi kyrmen ba ki pulit ki la ïaid shakhmat bad ki jingtohkit jong ki bad ngi khmih lynti ba kan don ka jingseisoh kaba kloi, ha kajuh ka por ban pynshitom da kaba tyngeh ïa kiba donkti katkum ka aiñ,” ka la ong.
