Shillong, Nailur 14
U Myntri Rangbah ka jylla, Conrad K Sangma ha ka Sngi Palei u la sam ïa ka ‘Work Order’ jong ka Pradhan Mantri Awaas Yojana (PMAY) sha ki nongïoh jingmyntoi na ka shnong Mawlyndep, Umsning C&RD Block, Ri-Bhoi District lyngba ka Saansad Adarsh Gram Yojana (SAGY-II).
Haba ai jingkren ha ka jingïalang, u Conrad u la ong, ki kam pynroi ki dei ban poi sha man la ki kyndong kynshrot jong ka jylla bad lada ka roi ka par kam poi sha ka jingim jong ki paidbah kiba sah ha kylleng ki bynta jong ka jylla, kumta ka roi ka par kan nym long satia kaba biang pura.
U Conrad u la ong, na ka liang jong ka sorkar ka la pyrshang katba lah ban pynïar bad ka la pynmih ïa ki prokram kiba rit bad kiba heh ha ki kyrdan bapher bapher ban wanrah ïa ka roi ka par kaba salonsar ïa ki paidbah ka jylla.
“Ka PMAY prokram kaba mynta ka dei sa kawei ka sienjam na ka bynta ban kynjoh ban ai ïa ka roi ka par kaba salonsar bad ka dei ka thong jong ka sorkar ban sam sha ki tnat kiba ïadei bad ka imlang sahlang ha ki snem ban wan,” u la ong.
U la ong ba ka thong jong ka sorkar ka dei ïa ki 5 tylli ki bynta kiba kongsan kiba kynthup ban ai ïing ïa baroh, ban pynbiang ïa ka bording ilektrik ïa baroh, ka jingshna ïa ki surok ban pynïasoh ïa ki shnong ki thaw, ka jingpynbiang umbam umdih ïa baroh bad ban pynbiang ïa ka Network Mobile.
Ha kajuh ka por u la pyntip ba kumba 1,30,000 tylli ki longïing kaba kot kumba T.1700 klur yn sa bhah bad pynshna lyngba ka mang tyngka jong une u snem ban pynthikna ba bun ngut ki briew kin ïoh jingmyntoi bad u la kyntu ïa ki nongïoh jingmyntoi ba ki dei ban pyndonkam ïa ka pisa kumba la bhah sha ki.
U la kyntu ruh ïa ki Rangbah Shnong, BDO, Project Director ba ki donkam ban pynsngewthuh sha ki paidbah bad ki nongïoh jingmyntoi ba kin pyndonkam ïa ka pisa na ka bynta ka kam kumba la dep bhah.
U la pynpaw ruh ïa kiwei pat ki projek kiba la pynkhreh na ka bynta ka shnong Mawlyndep bad ki shnong kiba marjan.
Ha kane ka sngi ki la don haduh 97 ngut ki nongïoh jingmyntoi na ka shnong Mawlyndep kiba la ïoh ïa ka Work Order.
Ha kane ka jingïalang la donlang u MP ka Rajya Sabha u Dr W Kharlukhi, u MLA ka Umsning u Dr C Lyngdoh, ka MDC jong ka Umsning ka Kong Macdalyne S Mawlong, u MLA barim ka Umsning u Bah Jason S Mawlong, ki heh ophisar sorkar bad ki bor pynïaid district.
