Mawkyrwat, Nailur:
Ka KSU South West Khasi Hills District ka pynpaw ïa ka jingsngewnguh bad ka jingkhublei ïa ka tnat ka koit khiah jong ka sorkar jylla khamtam eh ïa ka Kong Ampareen Lyngdoh, Myntri ba dei peit ïa ka tnat ka koit ka khiah halor ka jingmynjur jong ka ban shna ïa ar tylli ki Health Sub Centre hapoh Mawsynram C&RD Block kata ha shnong Mawhiang bad Jyllep.
Katkum ka kyrwoh khubor na u samla Forwardman Nongrem, President KSU South West Khasi Hills District u la ong ba kum ban shu pynkynmaw ba ka seng ka la leit ïakynduh khatduh ïa ka Myntri ka dei ha ka 26 tarik Ïaïong, 2023 ha kaba bun ki mat ka seng ka la rah ha kaba ïadei bad ka jingbuh ïa ka Health Sub Centre ha Jyllep bad Mawhiang ki dei kiwei ki mat kiba hakhmat.
Kumta na ka liang ka seng, ka sngewkmen shi kat dei eh hadien ba ka la ïoh jingtip ba ka tnat ka koit ka khiah ba la khlieh da ka Kong Ampareen kum ka Myntri ha ka 8 tarik Nailur 2023, ki la shim ïa ka rai ban mynjur ban phah shna noh ïa kine ki artylli ki Health Sub Centre.
Namar kata, na ka liang ka seng ruh ka kyntu ïa ka sorkar ba ka dei ban pyndep kloi ïa ki jingdonkam ban phah shna noh ïa kine ki Sub Centre khnang ba kan long ka jingmyntoi ïa ki paidbah ka dong ka thaiñ baroh kawei.
Shuh shuh, na ka liang ka KSU South West Khasi Hills District ka kyntu ruh ïa ka Kong Ampareen Lyngdoh ban wan jurip lem ïa ki CHC bad PHC ba don ha South West Khasi Hills District bad Mawsynram.
U la bynrap ruh ba ka seng ka khmih lynti ïa ka Myntri ban wan jurip kyrkieh khamtam ïa ka Civil Hospital kaba don ha Mawkyrwat khnang ban lap ïa ki jingduna hapoh kane ka jaka ai jingsumar, wat la ka la kham biang ban ïa kaba mynno-mynno, hynrei ka dang duna ha baroh ki liang khamtam ha ka jingdon jongki nongtrei haki post ba donkam khamtam kum ki doctors, ki specialists bad kiwei ki post ba donkam.
