Shillong, Nailur 15
U MLA ka UDP na Mawsynram konstitwensi, Bah Olan Sing Suiñ u la pynpaw ba haduh katno kata ka jingïatylli u Bah HM Shangpliang bad Bah Alvin Sawkmie kiba dei ar ngut ki kyrtong kiba dang shu shah rem ha ka ilekshon MLA, hynrei ma u bad ki nongkyrshan ka UDP kin trei shitom na bynta ka ilekshon MDC ban long ha u snem ban wan.
Haba ïakren kyrpang ha shlem treikam ha Secretariat, u Bah Suiñ u la ong ba um kwah ban ong eiei halor ka jingïatreilang hapdeng kine ar ngut ki kyrtong kiba shah rem ha ka ilekshon MLA ba dang shu dep. Yn nym tip aïu kan jia haduh ka ilekshon MLA ha u snem 2028, hynrei ma u pat un dang pynkhlaiñ ïa ka seng UDP ha Mawsynram konstitwensi.
U la pynkynmaw ba ha u snem 2018 haba u rem ïa ka ilekshon kiba bun ki kren duh mynsiem, hynrei u khlem shongthait ban shakri ïa ki paidbah haduh ban da jop ïa ka ilekshon MLA mynta u snem.
Haba kylli kaei ka buit kaba phi lah ban pynjop ïa ka ilekshon MLA mynta u snem, u Bah Suiñ u la ong ba um don kano-kano ka buit, hynrei kane baroh ka dei ka jingshaniah jong ki paidbah.
Nalor nangta, u la pynkynmaw biang haba u rem ïa ka ilekshon MLA ha u snem 2018 u sngew ba dei ban shongthait noh na ka kam ilekshon, hynrei khlem jingsngewthait u la trei ïa ka kam kat haduh ba ha u snem 2017 ki paidbah ki la pynbor ïa u ban ïakhun biang ïa kane ka ilekshon.
Nalor kata, u la ong biang ba lada u Bah HM Shangpliang uba ïoh shiphew hajar vote bad u Bah Alvin Sawkmie uba ïoh shiphew hajar vote ha ilekshon ba dang shu dep, hynrei ha ka saiñpyrthei ym lah ban tip namar ka por ka dang don sa saw snem shiteng.
