Shillong, Nailur 15
U nongïalam ka AITC, u Dr Mukul K Sangma u la kyntait halor ka jingdon kiba kam ba un leit rung sha ka BJP bad u la buh jingkylli ïa ki nongïalam ka BJP hato ki la don mo kiba ïakynduh bad u.
Haba kylli halor ka jingong u President ka BJP Meghalaya u Bah Ernest Mawrie ba u Dr Mukul um ïoh rung sha ka BJP bym pdiang ki nongïalam ka seng na Delhi, u Dr Mukul u la kylli, “hato ma u, u la ïakynduh bad nga ne u Dr Mukul u la ïakynduh ïa ki? Sa kylli na ki, lehse namarba ka saiñ hima jong ki kan nym jia khlem ka kyrteng jong nga.”
U Dr Mukul u la ong ba u la ïohi ïa kum kane ka khubor kaba la pynphriang khlem da kylli na u, bad ha ka jingshisha un da kmen eh lada ki paralok na ki lad pathai khubor kin shim ruh ïa ka jingmut na u haba pynmih kum kane ka khubor.
Kumta u Dr Mukul u la ong ba u dang peit thuh ïa ka saiñ hima hashwa ban rai ïa kano kano khamtam namar ka jingmih na ka ilekshon MLA 2023 ha kaba ka AITC ka jop tang 5 ngut.
U la ong ba donkam ban thew ïa kane namarba hap peit ïa ka ban sa wan ban pyntikna ban shakri ïa ki paidbah da ka jingkut jingmut bad aiti lut khnang ban ai kaba bha tam katba lah.
U la ong ruh ba kaei kaba donkam eh hakhmat ka long ban don ka jingmut kaba pynlong kawei ïa ka Jylla Meghalaya ban ïa kaba pyrkhat ban ïasoh bad kiwei pat ki seng.
U la ong ba ruh ym don ki seng saiñ pyrthei kiba pyrkhat ïa ka jinglong kawei ka Jylla ban tei ïa ka bad kyntiew ïa ka shalor.
“Kumta nga kham sngewkhia ïa kane ka Jylla kaba itynnad ha kaba ngi donkam ban don kata ka jinglong kawei,” u la bynrap.
Shuh shuh haba kren shaphang ka jinglong jingman ka suk ka saiñ ha Jylla kynthup ka jingjia ha Tura, u Dr Mukul u la ther ïa ka Sorkar Meghalaya Democratic Alliance kaba ïalam da ka NPP halor ka jingkem ïa ki samla pule kiba ka lawei jong ki kan shah ktah da kaba pynngat ruh ha ki kyndon aiñ kum ka Unlawful Activities (Prevention) Act kaba dei ban trei na ka bynta kito kiba donbynta ha ki seng ba shah ñiew be-aiñ kum ki seng lehnoh.
U la ong ba kaei kaba jia ha Tura ha ka 24 tarik Naitung ka long kum kaba la pynbeit lypa da ki bor Sorkar.
U la ong ba la ïohi ïa ka Sorkar kaba don ka mon wat ban shah ïa ki samla pule kiba dang dei ban tei ïa ka lawei jong ki la shah pynngat ha ki kyndon jong ka Unlawful Activities (Prevention) Act kaba dei na ka bynta ki dkhot jong ki kynhun ba shah ñiew be-aiñ.
Kumta u la pynrem ïa kane ka jingleh ka Sorkar ka ban pyntroiñ ïa ka lawei ki samla kiba dang khie dang san.
“Ka lawei jong baroh ka long kaba kongsan kumba long ka jong u Myntri Rangbah u Conrad Sangma bad ka lawei jong kine ki samla kiba dang dei ban bteng ïa ka jingpule. Lehse u samla ba shahkem uba dei tang ma u na ka ïing uba dei ban don ka lawei kaba kham phyrnai,” u la ong.
U Dr Mukul u la pynkynmaw ïa ka Sorkar ba ki don ki kyndon bad rukom kumno ban ñiew ïano ïano ne kynhun kum ki kynhun be-aiñ, bad ka Sorkar ka dei ban pynbeit ïa ki jingleh bymdei jong ka ha ka jaka ban long ka nongthaw ban leh ïa ki kam bym shonghok ïa kine ki samla ba lui-lui.
