Nongstoiñ, Nailur 15
Ka Hynñiewtrep Youths’ Council ( HYC) Mawshynrut Circle ka la maham tyngeh ïa ki katto-katne ki nongtrei ha Mawshynrut C& RD Block kiba pan bai sha na ki skhim bapher-bapher kum ha ka dor ka bai tiar jong ka skhim MGNREGS bad na ki skhim ïing baduk – PMAY.
Ha ka kyrwoh khubor ba la phah, ka HYC Mawshynrut ka la ong ba halor kane ka bynta ha ka Sngi Thohdieng ka la leit ban ïakynduh ïa u Block Development Officer (BDO) ka Mawshynrut Block, ha kaba u BDO u la kular ban shim khia ïa kane ka kam.
Ka HYC ka la pynpaw da kaba ong, “Ngi maham tyngeh ïa ki nongtrei bad ruh ïa ki paidbah ba kim dei shuh ban da ai bai sha sha ki nongtrei, ka dei hok ïa ki ban ïoh bad ym donkam ban ot nangne nangtai.”
Nalor katei ka mat, ka HYC Mawshynrut Circle hapoh ka jingïalam u President, Bah Losbingnel Lyngkhoi ha ryngkat kiwei ki dkhot ki la ïakynduh ruh ïa u BDO halor ka jingud-jingnam ki paidbah nongshong shnong na ka bynta ka jingsah kut bai bylla sngi bad tiar mynta u snem 2022-2023.
Shuh shuh ka HYC ka la pynpaw ba na ka liang u BDO u la kular hakhmat jong ka HYC ba un khmih bniah bad u la ong ruh lehse ka don ka jingbakla ha ki kot ki sla kaba pynlong ïa ka bai bylla sngi ba kan sah kut ne pynslem bad ruh ïa ka jingbym biang ka ‘generator’ hapoh ophis treikam; kane ka pynlong ïa ki paidbah ba kin ïakynduh jingeh khamtam ki nongshong hapoh ka Mawshynrut kiba wan na jngai namar ka jingsniew ka surok na ka bynta ka jingdonkam hapoh ophis C&RD Block bad ka shu pynlut kai ka por ka sngi.
Na ka liang ka HYC ka la kren halor ka jingbym wan trei tikna ki nongtrei ha baroh shi taïew hapoh katei ophis hynrei na ka liang jong u BDO u lah ong ba ki don ki nongtrei ki hap ban sah sha ki shnong na ka bynta ki kam baphe-bapher.
