Shillong, Nailur 15
U National President ka National People’s Party (NPP), u Conrad K. Sangma ha ka Sngi Thohdieng u la kren shai ba ki briew kiba thmu ban rung sha ka NPP kim dei ban buh ïa kino-kino ki kyndon haba ki pynïasoh sha ka seng.
“Ngi pdiang sngewbha ïa baroh kiba wan pynïasoh sha ka seng bad ngi ju ong barabor sha baroh ba ka jingpynïasoh kam dei ban don kano-kano ka jingbuh kyndon,” la ong u Sangma haba jubab sha ki lad pathai khubor halor ka jingwan pynïasoh NPP ba dang shen jong uwei u ’riewsaiñ pyrthei ka Jylla.
U la ong ruh, “Ngam ong ïa une uba wan pynïasoh hynrei nga kren ïa baroh. Kumta baroh ki pynïasoh na bynta ban shakri ïa ki paidbah bad ka Jylla bad trei lyngba ka seng saiñ pyrthei…kane hi ka dei ka jingthmu bad kumba nga la ong, kino-kino kiba don hapoh ka seng kiba kwah tiket, ki lah ban thep kyrteng bad ngin sa khmih bniah ïa ki.”
Halor u kyrtong na bynta ka ilekshon ban wan sha ka Lok Sabha, u la ïathuh ba ka seng ka la ïaid shakhmat bad kane ka kam bad ka dang khmih bniah ïa bun ngut ki kyrtong.
“Kane ka kam kan dang ïaid bad kan dei katkum ka synshar paidbah ha kaba ngin shah ïa ki briew ban ïashim bynta bad pynpaw ïa ka jingkwah jong ki ban ïakhun. Hadien kane, ngin sa jied ïa u kyrtong halor ka jingdon jingkyrmen jong u ban jop nalor kiwei-kiwei,” la ong u Sangma.
Haba pynpaw ba wat la ka jingmut halor u kyrtong ïamon lang ka lah ban long kaba biang eh, ha kawei ka liang, u la ong ba ki seng saiñ pyrthei ki don la ki jong ki nongrim bad rukom pyrkhat bad kumta kin kwah hi ban pynïeng ïa la u jong u kyrtong bad kane kam long kaba bakla.
“Ka ïasyrïem bad ngi kum ka seng haba phai sha ka NDA, ngi ïakhun ha ka ilekshon MLA. Kumba ka long, ki nongtrei jong baroh ki seng saiñ pyrthei ruh la ka dei ka UDP, HSPDP ne kiwei-kiwei, baroh ki nongtrei jong kine ki seng kin kwah ïohi ba ka seng jong ki ka kiew bad kumta kin kwah ïakhun ïa ka ilekshon,” u la ong.
Haba phai sha Tura, utei u khlieh nongïalam ka NPP u la ong ba katei ka kam kan long kumjuh bad ka seng kan sa khmih bniah ïa ki kyrtong.
“Hooid, ngi don ka MP napoh ka thaiñ bad kumta ngin kham pyrkhat na bynta ka MP hynrei wat la katta ruh, ngi don ka komiti ka ban khmih bniah haba ïadei bad ka jingai tiket bad kane kan ïaid kumjuh,” u la ong.
Shuh shuh haba kylli la u James Sangma un ïakhun ne em na Tura, u Sangma u la ban biang ba kiba kwah, ki lah ban pan tiket bad ka seng kan sa khmih bniah ïa kane ka bynta kane.
