Khliehriat, Nailur 15
Ki pulit ka tnad Anti-Narcotic Task Force (ANTF) ka East Jaiñtia Hills ha ka step Sngi Thohdieng ki la ïoh ban kurup ïa u drok ‘heroin’ uba don 550 gram ha kaba la kem noh ïa 2 ngut ki briew kiba donkti na ki bynta jong ka shnong Nongsning, EJH.
U Superintendent of Police ka East Jaiñtia Hills, u Jagpal Dhanoa lyngba kane u kyrwoh u la ong ba hadien ba ki la ïoh ïa ka jingtip kaba bniah, na ka liang ka tnad ANTF ka la ïoh ban bat noh ïa ki 2 tylli ki kali ‘tourist’ kiba wan na Mizoram halor ka jingsuba kit ïa ki jingdih be-aiñ.
U la ruh ba kane ka jingïoh kurup ka la wan long hadien ba ki pulit ka ANTF ha ryngkat ki nongtrei jong ka ‘Umtyra Check Gate’ nalor ki pulit ka Khliehriat PS hapoh ka jingïalam jong u Additional Superintendent of Police ka EJH, u Bah Banraplang Jyrwa ki la pynlong ka jingtalasi hapoh ka shnong Nongsning ha EJH hadien ba ki la sakhi ïa kitei ki artylli ki kali ha ka por kumba 8:30 mynstep.
Hadien ka jingtalasi nyngkong ïa ka kali kaba wan nyngkong ka Tata Sumo kaba don ïa u nombor ML-05-M-1597 ha ryngkat ka jingdonlang ki sakhi ba laitluid la ïoh kurup ïa saw tylli ki song sabon kiba la buhrieh ïa une u drok uba don ka jingkhia 43.33 gm, bad hadien ka jingkhynra ïa kawei pat ka Tata Sumo kaba don ïa u No MZ-01-K-3872 la ïoh ban kurup sa 44 tylli ki song sabon kiba don ïa une u juh u jingdih uba don ka jingkhia 516.43 gm, kata ïa kaba la pyntikna hadien ba la ‘test’ ïa ki.
Kine ki briew kiba la shah kem noh ki dei kiba la tip kyrteng kum u Lorence Zomuanpuia (32 snem ka rta) bad u Lalmalsawa (36 snem rta).
Na kine briew ki pulit ki la ïoh ruh ban kurup noh ïa ka pisa T. 2,200 kynthup ïa 2 tylli ki ‘mobile phone’.
Hadien kane la ujor mukotduma hapoh ki kyndon jong ka NDPS Act hapoh Khliehriat PS bad ka jingtohkit mynta ka la ïaid shakhmat ban lap dien ïa kiwei pat kiba donkti.
Na ka liang u Myntri Rangbah ka Jylla, u Conrad K. Sangma lyngba ka rynsan lad pathai u la ong ba utei u drok ba la ïoh kurup u shong dor kumba T.5.5. klur.
