Shillong, Nailur 15
U Symbud Myntri Rangbah uba peit ïa ka tnat Parliamentary Affairs, u Bah Prestone Tynsong u la kyntu ïa ki seng Liang Pyrshah ha Ïingdorbar Thawaiñ ba kin da ïatai bad don ka jingpynbeit lypa para maki haba wanrah ïa ki mat ha kane ka Dorbar Synrai namar lada ki dkhot ka Ïingdorbar ki wanrah ïa ki mat kiba long kumjuh, ka shu pynlut kai ka por bad duh noh ban ïatai ïa kiwei pat ki mat kiba donkam.
U Bah Prestone u la pynpaw ïa kane ha Ïingdorbar ha ka sngi Thohdieng kaba dei ka sngi ba sdang ka dorbar synrai jong ka Ïingdorbar Thawaiñ, ha kaba la pdiang ruh ïa ki sngi pynlong dorbar na ka bynta san sngi.
U Bah Prestone u la ong ba u kyntu ïa ki dkhot kiba don sha ka Liang Pyrshah ba haba ki phah ïa ki mat kiba dei ban ïatai ha Ïingdorbar ka bha eh ba kin da shong lang para maki ban ïakren.
“Nga la ïohi ba man ka por la ka dei ki jingkylli ne ki mat ïatai lyngba ka motion, resolution, special motion, zero hour notice ki shu kut noh (overlap) kumto namar ba uwei u dkhot ka Ïingdorbar wanrah kawei ka mat, bad na ka liang ka Sorkar ka la jubab, bad sa uwei biang u dkhot u wanrah kajuh ka mat, bad kumne ka shu lut ei ka por. Hynrei lada don ka jingïakren bad pynbeit lypa shwa ka por ban wanrah ïa ki mat, bad na ka liang ka ophis u Lamphang ruh ka lah ban pynbeit ïa ka por. Wat ki mat ïatai kum ka motion kaba donkam ruh ki shu kut noh bad ym ïoh por shuh ban ïatai ïa kiwei pat ki mat kiba donkam kiba la buh ban ïatai ha ka sngi shong dorbar,” la ong u Bah Prestone, haba kyntu ïa ki MLA jong ki seng Liang Pyrshah kum ka Congress, TMC bad VPP.
Kine ki seng Liang Pyrshah ki ïaid la kajong bad kim don jingïasngewthuh para maki hapoh Ïingdorbar khamtam haba wanrah ïa ki mat kiba dei ban ïatai.
