Nongpoh, Nailur 15
U Chief Executive Member (CEM) ka Khasi Hills Autonomous District Council (KHADC), u Bah Pynïaid Sing Syiem ha ka Sngi Thohdieng u la hiar dalade ban phah khang khyrdep ïa 46 tylli ki dukan bar jylla kiba khaïi be-aiñ bad ïaid lait na ki kyndon jong ka United Khasi Jaiñtia Hills District (Trading by Non-Tribals) Regulation, 1954 mynta la bun-bun snem.
Ha kane ka sngi, la synran lang ïa u Bah Syiem da 2 ngut ki Executive Member ba kynthup ïa u Bah Alvin Sawkmie bad u Bah Victor Rani.
Ha kane ka sngi la wan ban pynshngaiñ ruh da ki nongïalam jong ki 2 tylli ki seng ba kynthup ïa ka Khasi Students Union bad ka Hynñiewtrep National Youth Front.
Haba kren ha kane ka sngi, u Bah Syiem u la ïathuh ba ka Council hadien ka jingïoh jingtip ha kine ki khyndiat bnai ba la dep halor ka jingdon jong kine ki dukan bar jylla kiba treikam khlem ki kot ki sla kiba biang na ka liang ka Council, ka la phah da ka jingthoh haduh ar sien kynthih, hynrei, kitei ki bar jylla kim shym la burom satia bad kaba la pynlong ïa ka Council ba ka hap ban khang khyrdep noh shi syndon.
U la ïathuh ba lyngba katei ka jinghiar ban khang khyrdep ïa kitei ki 46 tylli ki dukan, la sakhi ruh ba ki dang don shuh-shuh da ki spah tylli kiwei de ki dukan kiba la pynïaid da kiwei ki jaidbynriew ki bym dei ki trai jylla. Halor kane ruh, u la bthah ïa ki ophisar ba dei khmih ïa kitei ki jaka ba ki dei ban ai jingthoh sha kitei ki dukan, bad ban pynbiang ïa ki kot ki sla hapoh shi taïew bad kumba long mynta, la phah khang shuwa shipor tat haduh ba ki la biang ïa ki kot ki sla.
Shuh shuh u Bah Pynïaid u la pynpaw ruh ba na ka liang ka Council ka dang ïai buddien halor kane ka kam bad u la ong ruh ba kumba long mynta, ka jaidbynriew Khasi ka la shah hiar thma ha kane ka kam khaïi-pateng bad la donkam ban pynkhlaiñ biang sa shisien ïa ka khaïi pateng para Khasi bad kyntu ruh ïa ki samla kiba don sap ha ka kam khaïi-pateng ban mih shakhmat ban knieh ïa kitei ki kam kiba la pynïaid da ki bar jylla baroh shi katta.
