Shillong, Nailur 15
U MLA ka UDP na Sohïong konstitwensi uba dang shu shah jied kum u nongmihkhmat u Bah Synshar Lyngdoh uba baroh ki tip kum u ‘Pup’ u la pynpaw ba u kynmaw ïa u Maheh HDR Lyngdoh haba u wan ban sdang shong dorbar kaba nyngkong kaba la long mynta ka Sngi Thohdieng.
Haba ïakren bad u Bah Synshar hadien ba la wai ka dorbar synrai kaba la sdang myn ha ka sngi Thohdieng u la pynpaw haba u rung sha ïingdorbar u ïeng na ka bynta u Maheh HDR Lyngdoh uba dei u kñi jong u bad na ka bynta ki paidbah ka konstitwensi kaba ki la jied ïa u ha ka ilekshon ba dang shu dep.
“Nga la buh haduh arphew lai tylli ki jingkylli kaba ngan sa kren hapoh ka ïingdorbar” u la ong.
U Bah Synshar u la ong ba ha kine ki sngi un sa kren ïa ka jingeh jong ki paidbah ka konstitwensi bad jylla baroh kawei.
Kum ban shu pynkynmaw u Bah Synshar u la shah jied kum u nongmihkhmat ha ka ilekshon MLA ha u bnai Jymmang mynta u snem hadien ba ïa ka ilekshon kaba dei ban long ha u bnai Rymphang la hap ban pynsangeh noh namar ka jingkhlad u Bah HDR Lyngdoh uba dei u kñi jong u.
