Shillong, Nailur 15
U kaitor bapawnam ka jylla, u Bah Gloucester Nongbet, un long uwei napdeng ki 84 ngut ki ‘riew don sap ha ka rwai ka siaw bad ka put ka tem bad kiwei pat kiba la shah jied ban ïoh ïa ka Sangeet Natak Akademi Amrit Award ban ai da u Vice-President ka Ri, u Jagdeep Dhankhar, ha ka Sngi Saitjaiñ ha New Delhi.
Kine ki 84 ngut ki dei kiba la palat ka 75 snem ka rta bad ki bym pat ju ïoh khusnam na ka Sorkar India mynno mynno ruh.
Ka Shongknor ka Sangeet Natak Akademi, ka Dr. Sandhya Purecha, haba kren sha ki lad pathai khubor ha New Delhi, ka la ong ba ka khusnam Sangeet Natak Akademi Amrit Award ka dei kaba la ai sha ki ’riew don sap ha ka put ka tem, ka rwai ka siaw bad kiwei. Kiba ïoh ïa kane ka khusnam ki dei ruh ki nonghikai bad ki ’riew wad bniah halor ka put ka tem, ka rwai ka siaw bad kiwei.
U Vice-President un sam ïa kitei ki khusnam lashai ka sngi ha ka jingïalang ka ban long ha Vigyan Bhawan, New Delhi.
Na Meghalaya, la jied ïa u Bah Gloucester Nongbet ban ïoh ïa katei ka khusnam kum ka jingithuh na ka bynta u synñiang ba u la pynnoh sha ka put ka tem tynrai.
Katkum u kyrwoh khubor na ka Sorkar Pdeng, la ong ba la kha ïa u Bah Nongbet ha ka 8 tarik Naitung, 1938 ha Shillong, bad u la don bynta ha ka rwai ka put tynrai naduh ba u dang khynnah.
U Bah Nongbet u dei ruh uba la tbit ha ka liang ka rwai ka siaw, ban thaw jingrwai bad ban put ban tem bad u la pynjanai ïalade ha ka jingtep ïa ka Duitara.
Ha kajuh ka por u don ruh ka sap ban shna ïa ka Duitara bad u tem ruh ïa kiwei ki jingput jingtem kum ka King, Flute, Guitar Electronic Piano. Une u rangbah u la thoh ruh ïa kiba bun bah ki jingrwai tynrai halor ki phang bapher bapher.
Nalorkata, u dei u ‘A’ Grade Artist ka All India Radio bad Doordarshan. U Bah Nongbet u la thoh ruh bun tylli ki phlim bad u la ïadon bynta kum u tyngshop ha ka phlim Khasi ba la ai kyrteng “Sha Ba Sep Ka Sngi” bad kiwei.
