Shillong, Nailur 15
Ka kali u nonglum khubor jong ka Batesi Tv u Bah Gee Jaraiñ ka la shah lynthem da u maw ïa ki bynta ka ïit ba na khmat ha ka step jong ka sngi Thohdieng mynta ka taïew kaba pynïeng harud surok hajan ïing kaba u sah ha Mawpat Circle 3.
Kane ka kali ka dei ka Datsun kaba don ïa u ML-05 W 1210 kaba la ïaid mynta la lai snem kynthih.
U Bah Gee u la ïathuh ba u la pynïeng ïa ka kali ha ka por 12 baje shiteng miet hadien ba la wan trei na ophis Batesi Tv, hynrei ynda u la mih mynstep ban leit lum khubor ba long Dorbar ki MLA mynta ka sngi u la lap ba ka ïit ka la pait lut.
Kumta u la kyntu ïa kino kino ki briew kiba don jingmut sniew kin kren da kaba shai wat nym pynjot ïa ka kali.
U la ïathuh ba naduh ba u la sah ha Mawpat ym pat don kano-kano kaba ïa don daw, hynrei u sngewtynnad beit, hynrei ym tip mano ba wan pynjot ïa ka kali kaba u la pynïeng ha surok baroh shi katta.
Ha kajuh ka por u la pyntip ruh sha ka shnong Mawpat ïa kane ka jingjia khnang ban tehlakam ïa kiwei pat ki kali lada don ki runar kiba pynjot ïa ki tiar jong kiwei.
Na ka liang u Managing Director ka Batesi Tv, Bah Joe Thangkhiew u la pynrem jur ïa kane ka jingpynpait ïa ka ïit kali u nonglum khubor namar kane kam long kaba sngewtynnad lada shu pynjot ïa ki mar ki mata, hynrei lada don kano-kano ka jingbym shai ki lah ban wan ïakren markhmat.
