Shillong, Nailur 15
U Myntri Rangbah ka Jylla, u Conrad K. Sangma ha ka Sngi Thohdieng u la ong ba ka Sorkar kam don jingmut ban khang ïa ka projek lynti rel, hynrei ha kajuh ka por kam pynbor hi ruh ban ïaid shakhmat bad kane ka projek.
“Ka jingsngew jong nga ka long kumjuh…haba phai sha ka roi ka par, baroh ngi kwah ban ïohi ïa ka jingwan jong ka lynti rel sha ka nongbah bad kan pynbha ïa ki lad pynïasoh, ka khaïi-pateng, ka ïoh ka kot bad kumta ter-ter. Hynrei hooid, ki don ki jingsngew bad ki nongshong shnong bapher-bapher ki don la ki jong ki jong ki jingpynsngew, kumta ngi kwah ban kynthup lang ïa baroh,” la ong u Sangma haba kren sha ki lad pathai khubor.
U la ïathuh ba kumba ka long mynta ka don ka pisa ba sah kaba la mang kyrpang na bynta ka projek bad lada ym lah ban ïaid shakhmat bad kata ka projek, yn pyntyllun bad pyndonkam noh ïa ka pisa ha kawei pat ka projek.
Ha kawei ka liang, u la ong ba kam mut pat ban khang ïa ka projek ba nyngkong, namar lada kaba nyngkong kam ïaid shakhmat, yn hap ïaid da kawei pat bad ka jingïakren kan ïai bteng bad yn kynthup lang ïa kito kiba don ka jingsngewkhia.
U la ong ruh ban pyrshang wad ïa ka lynti kaba ïahun lang da baroh khnang ban ïaid shakhmat bad ka projek namar kan long ka jingmanbha ïa ka Jylla.
“Kumta ki don ki jingplie lad bad ki ophisar ka NF Railway ki ong ïa kaba dei ba kam don jingkylli ban khang ïa ka hynrei kam don jingkylli ban pynbor hi ruh,” u la ong.
Haba kylli, u la ban biang ba ka don ka projek kaba nyngkong kaba ka Sorkar ka ïakynduh jingeh, bad kumta ka donkam ruh ban sngap ïa ki jingsngewkhia bad kumta kan kham shim por.
“Ka Sorkar India kan buh jingkylli ba sa katno phin buh ïa ka pisa…la ngin pynphai ne kynriah noh sha kawei pat ka projek hapoh ka Jylla bad pyndonkam ïa ka pisa khnang ba kan ym long leh nohei,” u la ong.
Na ka liang ka Sorkar ka dang pyrshang wad ïa kiwei pat ki thaiñ hapoh ka Jylla kiba kloi ban pdiang ïa ka lynti rel bad kane ka kam ka la sdang.
“Nga la pynpaw ïa kane kajuh sha u Mynri ka tnad rel bad u kloi ban sngap ïa ka jingai jingmut bad kumta ngin sa khmih bniah na kane ka liang bad peit la ki don kiwei pat ki projek ba ngin ïaid shakhmat,” u la ong.
Shuh shuh haba jubab, u la bynrap, “Ki sngewthuh ïa ki jingeh bad nga la pynsngewthuh sha ki ba namarba ka dei na bynta ka bha ka miat jong ki paidbah bad ka imlang-sahlang, ngi donkam ban kynthup lang ïa baroh bad ngin ïakren bad sngap ïa ki jingsngewkhia, ban wad ka lynti bad ban ïaid shakhmat bad ka projek.”
