Shillong, Nailur:
Ki paidbah ka shnong Nongtyngur ha ka Sngi Thohdieng ki lah ïoh ban bat ïa uwei u nong Bangladesh uba lah wan kiew tuh sha Ri-Khasi da ki jingthmu ban leh ïa ki kam sniew.
Hadien ka jingkem ïa utei u briew, na ka liang ki bor pynïaid shnong Nongtyngur ki lah aiti noh sha ka KSU Nongtyngur Unit ban bishar bad ban leit aiti sha ki bor pulit khnang ba utei u nong Bangladesh un shah pynshitom da kaba tyngeh.
Ka KSU Nongtyngur Unit bad ka KSU South Central East Circle ha ryngkat ka jingïatreilang bad ki bor shnong Nongtyngur ki la leit aiti noh ïa utei u nong Bangladesh sha ki pulit ka Thanat Pynursla, East Khasi Hills.
Ka jingïoh kem ïa utei u nong Bangladesh ka dei tang hadien ar-sngi ka jingshah pynïap dusmon kawei ka longkmie Khasi na ka shnong Donaskur, East Jaiñtia Hills ha uwei u Bangladesh uba lah pynïap ïa ka ha kawei ka jaka khlaw bad pharia lyngkhot lyngkhai ïa ka met naduh ki kti ki kjat, bad ot ruh ïa ka ryndang, ka jingjia kaba lah pynpar ñiangkhriat lut ïa ki paidbah kiba sah ha shi lynter ki khappud Bangladesh.
Shuh shuh ban shu pynkynmaw ba ki briew kiba sah ha shi lynter ki khappud Bangladesh ki mad na ka por sha ka por ïa kiba kine ki jingshah thombor ha ki nong Bangladesh, hynrei ha kaba na ka liang ki shipai BSF kim ju lah ban ai jingïada ne shimkhia ïa kiba kum kitei ki jingjia hynrei ki dei pynban ki nongpynjan bha, katba ïa ki trai shnong kiba dei ki Khasi bunsien ki ju shah pyndik pynsyier mynsiem bad leh tohmet ruh wat haduh ban da poi u pud ban mynsaw jur ne ïap ruh kumba ki jingjia ba dang shen ha ka shnong Mawshun kaba jngai na khappud hynrei ki shipai BSF ki lah wan ban siat ïap ïa uwei u rangbah Khasi haduh 5 kuli tang na ka daw ka jingsuba ba u donkti ban khaïi masi tuh sha Bangladesh.
Ki jingjia ha Lad Umsyiem ha kaba ki samla Khasi kiba ïaid ba ïeng ki lah mynsaw jur na ka daw ka jingbom pathar ki 2 ngut ki shipai kiba lah shah khaw’iang hynrei ki bor pulit kim shym lah ban leh eiei pyrshah ïa kitei ki shipai BSF.
Katkum ka kyrwoh kaba la pynpaw na ka liang ka KSU Nongtyngur Unit, ka seng ka dawa na ki bor pulit ba ka dei ban pynshitom tyngeh ïa kum kine ki briew (Bangladesh) kiba kiew tuh da ki jingthmu ban leh ki kam sniew, ym ban shu pyllait suk kumba la leh na kawei ka por sha kawei pat, la ong ka kyrwoh na ka GS KSU Nongtyngur, samla Melajied Khongbuh.
