Shillong, Nailur 17
Ka Bharatiya Janata Party (BJP) ka la rakhe ïa ka lyngkhuh sngikha ba 73 snem jong u Myntri Rangbahduh ka ri, u Narendra Modi.
Ka prokram kaba la sdang da ka jing-ot ‘cake’ da u National Vice President ka seng, u Chuba Ao ka la sakhi ïa ka jingïashim bynta jong ki nongkitkam ka seng hapoh ka Jylla, distrik, dkhot ka Mahila Morcha bad Yuva Morcha ha shlem treikam ka seng ha Shillong.
Hadien kane, u Myntri Sorkar Pdeng, u Prallad Joshi u la wan ïashim bynta lang ha ka prokram.
Kum ban shu kdew hangne, ka BJP ka la pynbna ïa ka prokram ba artaïew, kata naduh 17 tarik mynta u bnai haduh ka 2 tarik u Risaw ban kner ïa ka jingshakri sha u duk u suk lyngba ki skhim kaba ka Sorkar ka la pyllait.
Ha kajuh ka por, u Myntri Rangbahduh ka ri, u la pyllait ïa kawei ka skhim thymmai na bynta ki nongshna jingshna bad ’riewdon sap kaba la tip kum ka ‘PM Vishwakarma Scheme’ kum shi bynta jong ka jingrakhe ïa ka ‘Vishwakarma Jayanti’.
Ka jingthmu jong kane ka skhim ka long ym tang ban ïarap pisa da kaba pynbiang ram sha ki, hynrei ban pynim ïa ka lariti, riti-dustur bariewspah bad ki jingdon-jingem ki mynnor spah snem ba la leit noh lyngba ki mar tynrai, ka sap ka phong bad ka jing-oh shrong.
Kane ka skhim ka dei kaba la kyrshan pisa pura da ka Sorkar Pdeng ha ka jinglut kaba T.13,000 klur.
Ha ka jingïalang mynta ka sngi, u National Vice President ka seng, u Chuba Ao u la pynsngew kumno u Modi u la aiti la ka jingim na bynta ki nongshong shnong ka ri.
U la ong ba ka jingïohi jngai jong u Myntri Rangbahduh ka la ïalam ïa ka India ban long ka ri ban wan banyngkong ha ka kyrdan ha ki liang bapher-bapher.
Shuh shuh u la bynrap ba mynta, baroh ki khlieh nongïalam jong ki ri ba hakhmat ki ngeit bad shaniah skhem ha u Modi.
Ïa ka sngikha u Modi la rakhe ruh ha ki distrik bapher-bapher ba kynthup ha Regional Office, Tura.
