Tura, Nailur 17
Ha ryngkat ka jingthmu ban pynneh-pynsah bad ban pynbha ïa ki kyntien Garo paka kiba la sdang jah, ki ’riew pawkhmat ka Tura ha ka Sngi Saitjaiñ ki la shong jingïalang ha Extension Training Centre (ETC) Conference Hall, Dakopgre, hapoh ka jingpynïaid u CEM barim ka GHADC, u P.K. Sangma.
Ki dkhot kiba la don lang ha katei ka jingïalang ki la pynpaw ïa ka jingsngewkhia haba ïadei bad ka jinghiar jong ka ktien Garo – ka ktien kaba riewspah ha ki kyntien lajong shisien ka por khlem da donkam ban ïapan na kiwei pat ki ktien.
Hadien ka jingïamir jingmut kaba sani bha, la lah ban thaw ïa ka kynhun thymmai ïa kaba la tip kum ka “Ku•mandi Kotok” kaba mut – ka kynhun trei halor ka ktien Garo, ki kam ha ka imlang-sahlang bad ka riti-dustur bad ka thoh ka tar nalor kiwei-kiwei.
Ka Ku•mandi Kotok ka la khlei jutang ban trei ryngkat bad ka A•chik Literature Society (ALS) ban pynneh-pynsah ïa ka jingriewspah jong ka ktien Garo, lariti bad riti-dustur nangne shakhmat.
Ha kajuh ka por, la jied ïa ka ‘Adhoc Committee’ ba kynthup ïa 7 ngut ki dkhot hapoh ka jingïalam u Purno K. Sangma kum u President, Vicky Rose N. Sangma – Vice President, Arcosh M. Momin – General Secretary, Milkreyash D. Sangma – Joint Secretary, Salning R. Sangma – Treasurer, Edmund K. Sangma – Advisor bad M. K. Marak, MCS ba la shongthait kum u Advisor.
Ki ’riew rangbah na ki bynta bapher-bapher kiba shong ba sah ha ki jaka bapher-bapher ka Assam bad Meghalaya ki la ïashim bynta ha ka jingïalang ba kynthup ïa u Ronald S. Sangma, MCS ba la shongthait bad Dr. Merill N. Sangma, Principal ka Mason Phillips Academy, Tura.
