Srinagar, Nailur 17 (UNI)
Ka jingïakhun hapdeng ki bor pahara bad ki lehnoh ha Anantnag distrik jong ka Jammu & Kashmir ka la kot sha ka sngi kaba san ha ka Sngi U Blei.
Ka jingïakhun ha Gadol Kokernag, Anantnag ka long kaba eh bad ba shyrkhei na ka bynta ki bor pahara namar ka jingrben ka khlaw.
Ki shipai ki la pyndonkam da ki ‘Drone’ bad kiwei pat ki tiar siat ba khlaiñ bor ban ïaleh pyrshah ïa ki lehnoh. Hynrei haduh mynta, ym pat don khubor halor ka jingïap jong ki lehnoh.
“Kane ka jaka ka long kaba jwat bha namar ha shiliang ka don ka khlaw ba rben bad ha shiliang pat, ka jaka ka long sharing bha,” la ong ki heh shipai kiba la ïadon bynta ha kane ka jingïakhun. Ki bor pahara ki la pynlong ïa ka jingkhang kdong kaba jur ha Gadole Kokernag khnang ban ïoh ïa ki lehnoh.
Ha ka Sngi Saitjaiñ, ka dur khih ba la ïoh tan da ka ‘Drone’ ka pyni ïa kawei ka jaka kaba la shah pynjulor ïa kaba la suba ba ka dei kaba la rieh tngen da ki lehnoh. Kawei pat ka dur khih ka pyni ïa uwei u lehnoh uba la phet rieh hadien ba ka jaka kaba u shong ka la shah pynjulor.
Ki shipai ki la ong ba kane ka jingïakhun ka long kaba shimpor na ka daw jong ka jinglong jingman ka jaka ha kaba ki bor pahara kin hap ban husiar bha.
Kane ka jingïakhun hapdeng ki bor pahara bad ki lehnoh ka la sdang naduh ka Sngi Balang jong ka taïew ha kaba arngut ki heh shipai, u Colonel Manpreet Singh, Commanding Officer ka 19 Rashtriya Rifles, u Company Commander, u Major Aashish Dhonchak, uba na ka 19 RR hi, bad u Deputy Superintendent of Police, u Himayun Muzamil Bhat, ki la khlad katba arngut kiwei shipai ki la mynsaw na ka jingshah siat ha ki lehnoh.
