Shillong, Nailur 17
Ka synjuk ki nonghikai jong ka All Primary School Teachers’ Association (APSTA) ka la pynlong ïa ka jingkynmaw burom ïa ka lyngkhuh sngi khlad kaba 174 jong u Thomas Jones ïa uba la tip kum u kpa ki dak thoh Khasi, bad ïa ka jingdap 181 snem jong ka jingdon ka Lower Primary School (LPS) ha Rilum Khasi Jaiñtia.
Ïa kane ka jingrakhe la pynlong ha Umkor Urksew Stadium, Pynursla ha kaba palat 1,200 ngut ki nonghikai skul Primary Government bad Deficit Lower Primary ki la wan ban ïashimbynta lang na kylleng ka Ri Khasi.
Ha katei ka sngi, u Symbud Myntri Rangbah u Bah Prestone Tynsong u la long kum u kongsan bad u Myntri ka tnat pule puthi, u Rakam A.Sangma kum u Symbud kongsan, nalor u General Secretary ka AMPSTA u Bah F.C Shullai bad kiwei kiwei.
U Bah Tynsong haba ai jingkren ha kane ka sngi u la pynkynmaw ba ki nonghikai Primary ki long ki nongsaiñdur jong u namar u ong ba u long kumne kumba u long mynta, dei na ka jingai mynsiem ki nonghikai jong u ha ka Primary Level. U Bah Tynsong u la kular ruh ba ka Sorkar kan pyllait noh ïa ka arrear 25% kaba dangsah jong ki nonghikai skul deficit shwa ka shuti Khristmas.
Na ka liang u Myntri ka tnat pule puthi, u Rakkam A Sangma u la ïaroh ïa ki sap bapher bapher ba ki nonghikai primary ki don bad u la ong ba ki nonghikai primary ki long ki nongsaiñdur jong ka Jylla, ka ri bad ka jaitbynriew.
Katba u Rakkam u la pynpaw ka jingsngewkmen ba ma u kum u khun jong ki nonghikai skul primary un long u Myntri ka tnat pule puthi.
U la ïaroh ruh ïa ki matti jong u (L) Rev Thomas Jones-I na bynta ka jaitbynriew Khasi Jaiñtia, ha kaba u la ong ba u Thomas Jones bad ki missionary na shiliang duriaw ki wan ym tang ban wanrah ïa ka jingngeit Khristan, hynrei ban pynlong ïa ki nong Meghalaya ki briew kiba khambha.
U Rakkam u la kular ban pynurlong ïa ki jingdawa bapher bapher jong ka synjuk kiba la buh hakhmat jong u lyngba u General Secretary.
Ha katei ka sngi la don ruh ka jingpynkup burom ïa u Babu F.C Shullai General Secretary ka synjuk halor ka jingshahjied jong u kum u dkhot jong ka State Education Commission.
Ka la don ruh ka jingpynkup burom ïa ki nonghikai kiba la shongthait jong ka synjuk. Ha katei ka sngi ka APSTA ka la kner ruh ka kti ai jingïarap T.5000 sha ka R&I Khasi Channel, Khristmas makeover 2023, sha ka jaka ri khunswet NEIMA bad sha ka Parish Pynursla mar T.50,000.
