Tura, Nailur 17
U nongtrei mon sngewbha, u Nilberth Ch Marak ha ka Sngi U Blei u la kyrpad ïa ka Lokayukta ban pynkloi bad tohkit mardor halor ka jingkynnoh bym pyntreikam ïa ka jingmaramot haba ïadei bad 32 tylli ki Flood Damaged Pipelines (FDR) GR-B ha baroh kawei ka distrik jong ka East Garo Hills.
Ha ka shithi sha u Director – Inquiry & Prosecution, u Marak u la ong ba la pynmih ïa ka hukum da u Chairman ka Meghalaya Lokayukta kaba bthah ïa u A.K. Sangma, MPS (RTD), dkhot ka Inquiry Wing ban sdang ïa ka jingtohkit halor ki jingkynnoh kumjuh ban aiti ïa ka kaiphod hapoh 3 bnai.
“La sngewthuh lyngba ka tyllong khubor kaba shaniah ba hadien ba la ïoh kopi jong ka hukum ha ka 8 tarik u Nailur, ka kynhun ba mar pyrshah, ka pyrshang ban khring ïa ki nongïalam shnong bad ïa u Rangbah Shnong ban phah ïathuh ïa kaei ka bym dei hakhmat ki ophisar ba wan tohkit bad ki pyrshang ruh ban mushlia bad ka sabut. La sngewthuh ruh ba ka liang ba mar pyrshah mynta ka la pyrshang ban pyntreikam ïa ka projek ban tap-eit-miaw ïa ka kam be-aiñ jong ki,” la ong u Marak ha ka shithi.
Na ka liang u Marak u la kyrpad ïa u ophisar ban shim khia noh kloi ïa katei ka kam, ha kajuh ka por ban pynsted ïa ka jingtohkit kumjuh ban aiti ïa ka kaiphod ha ka por kaba biang.
